Иракт 19 курд эмэгтэйг амьдаар нь шатаажээ

354
Иракт 19 курд эмэгтэйг амьдаар нь шатаажээБАГДАД. /Sputnik/. Иракийн Мосул хотод  "Лалын улс” бүлэглэлийн хэт давруу үзэлтнүүд 19 курд эмэгтэйг цэргүүдийн бэлгийн боол болохгүй хэмээн эсэргүүцсэнийх нь төлөө олны өмнө амьдаар нь шатаасан байна.

Энэхүү аймшигт аллага өнгөрсөн пүрэв гарагт "Лалын улс” бүлэглэлийн түшиц газар болсон Мосул хотын нэгэн талбайд хэдэн зуун оршин суугчдын өмнө болжээ.

 "Лалын улс” бүлэглэлийн террористууд эмэгтэйчүүдийг төмөр торонд хийн түгжээд амьдаар нь шатаажээ. Хэт давруу үзэлтнүүд Иракийн хойд хэсгийг 2014 онд эзлэн авсан юм. 400 мянга орчим хүн тус бүс нутгаас дүрвэн гарч чадсан ч хэдэн арван мянган хүн амтай нутгийн язиди омгийн хүмүүс зугтаж чадаагүй аж.

Сүүлийн жилүүдэд шашны цөөнх болсон олон хүмүүс амиа алдаж, хулгайлагдаж мөн хүчиндүүлсэн ажээ. Мянга мянган язиди охид бүсгүйчүүд "Лалын улс” бүлэглэлийн цэргүүдэд олзлогдон бэлгийн боолчлолд өртөөд байгаа бөгөөд тэднийг дамжуулан худалддаг байна. Тэндээс зугтаж гарсан хүмүүсийн ярьж буйгаар, зарим эмэгтэйчүүд "Лалын улс” бүлэглэлийн аймшигт яргалалтаас өөрсдийгөө аврахын тулд амиа хорлодог гэжээ.

НҮБ-ын тооцоолсноор, "Лалын улс"-ынхан 3500 орчим хүмүүсийг боолчилж байгаагаас ихэнх нь язиди эмэгтэйчүүд ажээ. "Лалын улс” бүлэглэлийн эзэлсэн газруудад хэн нэгэн хүн өөр шашинтай эсвэл тус бүлэглэлийн тогтоосон дэглэмийг эсэргүүцвэл шууд боол болгодог ажээ.

Язиди нар нь өөрсдийн гэсэн шашинтай угсаатны бүлэг бөгөөд хэт давруу үзэлт лалын шашинтнууд тэднийг чөтгөрийг шүтэгчид гэж үздэг ажээ.

"Лалын улс” бүлэглэл нь Ирак, Сири, Ливид суурьшсан террорист бүлэг бөгөөд өөрсдийгөө лалын шашны цэвэр урсгал гэдэгт итгэдэг ажээ. 

Х. Сарнай

Эх сурвалж: Монцамэ

Санал болгох

Сэтгэгдэл

АНХААРУУЛГА: Уншигчдын бичсэн сэтгэгдэлд www.ENE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 9318-5050 утсаар хүлээн авна.