Тус байгууллагын нэр дэвшигчдийн сунгаа  хэдхэн хүний сандал ширээний төлөөх суудал биш, спортын салбарынхан цаашлаад  нийт монголчуудын эрх ашгийн төлөө байх учиртай. Тэгвэл нэр дэвшигчдээс одоогийн ерөнхийлөгч Д.Загдсүрэнг ажлаа өгөх цаг болсон гэх хүмүүс олон байгаа бол УИХ-ын гишүүн асан Э.Мөнх-Очирыг ч мөн эсэргүүцэгчид цөөнгүй байгаа юм.

Учир нь Э.Мөнх-Очирын түүх тийм ч сайнгүй гэдгийг хүмүүс, тэр дундаа улс төрийн хүрээнийнхэн мэднэ. Тэрбээр МАН-ын  удирдах зөвлөлийн гишүүн байхдаа урваач, шарваач цол зүүж, намынхаа эсрэг ажилласан хэмээн  намаасаа хөөгдөхдөө тулж байсан. Учир нь 2013 оны Ерөнхийлөгчийн сонгуулийн үеэр намынхаа нэр дэвшигчийг "нам цохисон” ярилцлага хэвлэлд өгснөөс болж  тэр.

Ер нь зөвхөн МАН ч гэлтгүй улстөрчдийн дунд ихээхэн цацаа цалгиатай нөхдийн тоонд УИХ-ын гишүүн асан Э.Мөнх-Очир зүй ёсоор багтдаг. Түүнийг 2012 онд  "Туул ривер контрисайд”-ын хэрэгт холбогдуулан АТГ шалгуулахаар өгч байсан.  Э.Мөнх-Очир 2007 оны тавдугаар сарын 9-ний өдөр 130 тоот захирамж гаргаж БНСУ-ын 100 хувийн хөрөнгө оруулалттай "Туул ривер контрисайд” компанид Баян зүрх дүүргийн Гачуурт тосгоны нутаг дахь Хадуурт тохоо хэмээх газарт анх 50 га газрын зөвшөөрөл олгохдоо албан тушаалаа урвуулан ашиглаж, Авилгын эсрэг хуулийн 7.1.2 болон 7.1.5 дахь заалтыг зөрчин тус компанид давуу байдал олгосон гэж үзэн АТГ шалгуулахаар өгсөн байдаг.

Энэ мэт Э.Мөнх-Очирын бараан түүх дуусахгүй. Ямартай ч Турк улсад Консулаар сууж байгаад саяхан эх орондоо ирсэн Э.Мөнх-Очир одоо  Монголын Үндэсний олимпийн хорооны ерөнхийлөгч болохоор санаархаж явна. Намынхаа эсрэг ажилласан хэмээн хөөгдөхдөө тулж байсан тэрбээр спортын хороодыг  нягт  уяж ажиллах нь юу л бол.

Э.Мөнх-Очир 2000 оноос Монголын буудлага спортын холбооны Удирдах зөвлөлийн гишүүн, 2008 оноос одоог хүртэл тус холбооны ерөнхийлөгчөөр ажиллаж байгаа юм. Гэхдээ тэр дан ганц буудлага спортын холбоог удирддаггүй. 2010-2014 онд Монголын самбо бөхийн холбооны ерөнхийлөгчөөр ажиллаж байгаад, 2014 оноос Дэд ерөнхийлөгч болсон. Мөн өнгөрсөн жилээс Монголын биатланы холбооны ерөнхийлөгчөөр сонгогджээ. Түүний спорттой холбогдсон түүх энэ юм.

Эцэст нь хэлэхэд Монголын Үндэсний олимпийн хороог жоохон зангарагтай, нүүрийн буянтай хүн удирдахгүй бол зодоон хийсэн хэрэгт холбогдож явсан Э.Мөнх-Очир буюу "Нударга-Очир” зэрэг хүмүүс ай мэдэхгүй ээ.

Эх сурвалж: Bolod.mn