Ч.Бээжинхүү: “Уран ган” компанийн захирал Б.Лхагвасүрэнг буруутайг шүүх тогтоосон, одоо эрүүгийн хэрэгт шалгагдаж байгаа

934
 
 Ч.Бээжинхүү: “Уран ган” компанийн захирал Б.Лхагвасүрэнг буруутайг шүүх тогтоосон, одоо эрүүгийн хэрэгт шалгагдаж байгаа

"Ихэр нева” компанийн захирал Ч.Бээжинхүү "Уран ган” ХХК-ийн захирал Б.Лхагвасүрэн гэх хүний хууль бус үйлдлээс болж мөн ч хэцүүдэж байна даа, эгч нь. Хан-Уул дүүргийн нутаг дэвсгэр Зайсангийн аманд байх газраа, олон жилийн турш уйгагүй хөдөлмөрлөж босгосон компаниа тэр хүнд алдсан. Тэр хүн ядарсан эмэгтэйг яаж ч болно, Монголын хууль, шүүх мөнгөгүй хүнд огт үйлчлэхгүй гэсэн шиг л авирлаж, хууль зөрчсөн. Бүр хуурамч бичиг баримт бүрдүүлж, бусдын эд хөрөнгийг улаан цайм өөрийн болгож авдаг муухай технологи Монголд бий болчихоод байна. Үүнээс болж амьдрал минь доройтож,  хэдэн жил хууль, шүүхийн үүд хаалга сахиж зогслоо” хэмээн ярив. Тэрээр "Уран ган” ХХК-ийн захирал Б.Лхагвасүрэн гэгчид газар, компаниа хууль бусаар хэрхэн алдсан,хууль хяналтын байгууллага ямар учраас түүний хууль бус үйлдлийг таслан зогсоож, хариуцлага хүлээлгэлгүй өдий хүрч байгаа талаар ийн ярьсан юм.


–Та "Уран ган” ком­па­нитай хэзээ, ямар шалт­гаа­наар холбогдсон юм бэ. Газар, компаниа алдсан шалт­гааныг асуумаар байна?
-Бүх болсон зүйлийг үнэн зөвөөр нь танай сонины уншигчдад ярьж болно. Хэн нэгний нэр хүндэд халдсан зүйл огт байхгүй. Зөвхөн хууль хяналтын байгууллагын баримтанд тулгуурлаж ярьж байгаа гэдгээ албан ёсоор хэлмээр байна.  2004 онд Хан-Уул дүүргийн  нутаг дэвсгэр Зайсангийн аманд би газартай болсон юм. Ингээд 2008 онд "Ихэр нева” компанийн нэр дээр газрынхаа гэрчилгээг гаргуулж авсан. Тухайн үеийн Төрийн тусгай хамгаалалттай газар нутгийн тухай хууль, журмын дагуу газрын гэрчилгээгээ авсан. Газраа ашиглах гэсэн боловч хөрөнгө санхүү шаардлагатай болсон. Тэр үед "Уран ган” компанийн захирал Б.Лхагвасүрэнтэй танилцсан хэрэг. Тэр хүн "Танай энэ газар дээр бидний төлөвлөж байгаа барилга байгууламжийг барьж болох юм байна. Бид ийм нөхцөлтэйгээр та бүхэнтэй хамтран ажиллах боломжтой” гээд хийх ажлынхаа талаар бидэнд танилцуулж, санал тавьсан. Түүний тавьсан санал боломжийн санагдаад Хөрөнгө оруулалт хамтын ажиллагааны гэрээ хийлээ. Эндээс л түүний хууль бус үйлдлүүд эхэлж, миний эрхэд ноцтойгоор халдаж эхэлсэн юм. Тухайн үед барилгын зураг төсөл гээд бүх зүйл нь хийгдчихсэн байсан. Зөвхөн барилга барих л дутуу байсан. Гэтэл хамтран ажиллах хөрөнгө оруулалт, хамтын ажиллагааны гэрээ хүчин төгөлдөр үйлчилж байхад буюу 2013 оны дөрөвдүгээр сарын 11-нд  Байгаль орчин аялал жуучлалын яаманд "Уран ган” компанийн захирал Б.Лхагвасүрэн нэгэн хүсэлт илгээсэн байдаг. Ямар учиртай хүсэлт вэ гэхээр "Зайсанд байх 3.3 га газрыг өөрийн төрсөн хүү Л.Золбоогийн удирддаг "Далай ван” компани руу шилжүүлж өгнө үү” гэсэн хүсэлт тавьсан байдаг. Тэр үед БОАЖЯ-нд Б.Лхагвасүрэн ийм хүсэлт өгсөн гэдгийг би огт мэдээгүй байсан. Бүүр сүүлд мэдсэн. Энэ хүний хөрөнгө оруулалт хамтын ажиллагаа хийсэн гол зорилго нь ерөөсөө л миний газрыг, эзэмшил компанийг маань авах байсан юм байна лээ.


 –Таны нэр дээр байгаа газрыг яаж Б.Лхагвасүрэнд өгсөн байх вэ. БОАЖЯ-ны тухайн үеийн дарга нар газрын гэрчилгээг нь хэрхэн гаргаж өгсөн байдаг юм бэ?
-Ч.Бээжинхүүгийн "Ихэр нева” компанийн нэр дээр байдаг Хан-Уул дүүргийн нутаг дэвсгэр, Богдхан уул Зайсангийн аманд байдаг 3.3 га газар нь БОАЖЯ-ны  наймдугаар сарын…  өдрийн газар ашиглах эрх бүхий 2008 оны 661 тоот албан ёсны гэрчилгээтэй. Гэтэл тэд миний нэрийг хасаад "Ихэр нева” компанийн захирал Бат-Очирын Лхагвасүрэн гээд гарын үсэг зурчихсан хүсэлт гаргасан байдаг. Газар ашиглах гэрчилгээн дээр нь Ч.Бээжинхүү гэсэн миний нэр байсаар байхад Б.Лхагвасүрэн гээд гарын үсэг зураад өгчихсөн байсан. Үүнийг нь тухайн үеийн БОАЖЯ хүлээн аваад газрын гэрчилгээ гаргаад өгчихсөн байдаг. Өөрөөр хэлбэл, яамны холбогдох албан тушаалтнууд ажилдаа хайнга хандсан уу, эсвэл санаатайгаар хууль зөрчсөн үү мэдэхгүй. Би газраа хууль бусаар алдсан гэдгээ мэдээд л Чингэлтэй дүүргийн цагдаагийн хэлтэст шууд хандсан. "Уран ган” компанийн захирал Б.Лхагвасүрэн нь бүх бичиг баримтыг хуурамчаар үйлдсэн. Бүр газрын гэрчилгээнээс эхлээд компанийн албан бичиг, тамга тэмдэг материалыг скайнердаж, нотариотын тамга тэмдэг хуурамчаар ашигласан нь бүх баримтаар маш тодорхой тогтоогдсон байдаг. Хэргийг шалгасан цагдаа прокурор хууль зөрчсөн гэдгийг тогтоосон дүгнэлтээ гаргачихсан байгаа. Одоо хүртэл жинхэнэ, албан ёсны бичиг баримт маань надад хадгалаастай байна. Мөн миний бие энэ талаар Захиргааны хэргийн шүүхэд гомдол гаргасан. Улсын дээд шүүх "Б.Лхагвасүрэнгийн хийсэн үйлдэл нь хууль бус” гэсэн шийдвэр гаргасан. Өөрөөр хэлбэл, шүүхийн тогтоолоор Б.Лхагвасүрэн гэх хүнийг гэм буруутайг нь тогтоосон.


–Газраа ийм байдлаар алдчихдаг юм байж. Компаниа яагаад алдчихсан юм бэ?
-Газрын гэрчилгээг хуурамч бичиг баримт бүрдүүлээд авсны дараа миний эзэмшлийн "Ихэр нева” гэх компанийн захирлыг мөн л хууль бусаар сольж, Чулууны Мөнхжаргал гэдэг хүнийг томилчихсон байдаг. Монголд хууль үйлчлэхгүй юм шиг л эрх дураараа авирласан байдаг. Б.Лхагвасүрэн өөрийнхөө хүүхэдтэй хамтарч, хуурамч бичиг баримт бүрдүүлээд компанийн захирлыг томилсон байсан. Энэ талаар бүр тодруулж хэлэх юм бол Нийслэлийн шийдвэр гүйцэтгэгч хурандаа Оюунцэцэг гэж хүн байдаг. Түүнтэй хамтарч энэхүү хууль бус үйлдлээ хийсэн юм билээ. Шүүхээс мөн л "Б.Лхагвасүрэнгийн энэ үйлдэл нь хууль бус” гэдгийг тогтоочихсон. Хаа очиж Монголын шүүх үнэнийг олж тогтоож чаддаг юм байна лээ. Шүүхийн байгууллагад итгэх итгэл маш их нэмэгдсэн. Үнэхээр хэргийн үнэн мөнийг шүүх тогтоож өгч чадсан. Би алдсан газраа, компаниа ч буцааж авч чадсан. Б.Лхагвасүрэн нарт холбогдох хэрэг Чингэлтэй дүүргийн цагдаад одоо ч шалгагдаж байна.


-"Уран ган” компанийн зүгээс 400 мянган ам.дол­лараар газрыг нь худалдаж авсан. Ч.Бээжинхүү зали­лан хийдэг гэх мэдээлэл гарга­сан байсан. Энэ талаар та ямар хариулт өгөх вэ?
-"Нэр хугарахаар яс хугар” гэж эртний сайхан үг бий. Миний нэр төрд халдсан мэдээллийг зохион байгуулалттайгаар хэвлэл мэдээллийн хэрэгслээр цацаж байна. Үнэхээр би газраа, компаниа зарчихсан бол юу гээд ингээд явж байх билээ. Монголын шүүх ч миний талд шийдвэр гаргаж, цагдаа, прокурор хэргийг мөрдөн шалгаж, гэм буруутай гэдгийг нотолсон тогтоол гаргахгүй биз дээ. Ядарсан эмэгтэй намайг дээрэлхэж доромжилж, басамжилж ийм ор үндэслэлгүй худал мэдээлэл гаргасан байна лээ. Б.Лхагвасүрэн гэх хүн над руу 400 мянган ам.доллар шилжүүлсэн гэх банкны хуулга барьчихаад яваад байдаг. Би үүнийг танил талаа ашигласан эсвэл хуурамчаар банкны хуулга үйлдсэн гэж харж байгаа. Үнэхээр л мөнгө шилжүүлчихсэн юм бол аль банкаар хэдэн сарын хэдний өдөр шилжүүлсэн бэ гэдэг нь банкны мэдээллээр гаргаад ирнэ биз дээ. Сүүлийн үед хэвлэл мэдээллийн хэрэгслээр миний нэр төрийг гутаан доромжилж,  маш их дайралт, дарамт шахалт үзүүлж байгаа.


–Таны  эзэмшлийн газар дээр орон сууцны хотхон барьчихсан асуудал байгаа.  Хаанаас ямар хөрөнгө оруу­лалт хийгдээд газрын мар­гаан­тай байсан газарт ба­рилга баригдчихсан юм бэ?
-Ч.Бээжинхүүгийн мэдлийн "Ихэр нева” компанийн эзэмшлийн газрын гэрчилгээг Б.Лхагвасүрэн "Далай ван” компанийн газрын гэрчилгээ болгож хуурамчаар үйлдэж скайнардаж гаргасан байдаг. Улмаар БНХАУ-ын хөрөнгө оруулалттай компанийн итгэл үнэмшлийг олж аван барилга барих хөрөнгө оруулалт хийчихсэн байдаг. Энэ хууль бус үйлдэл хавтаст хэрэгт авагдчихсан байгаа. "Далай ван” компани руу хууль бусаар миний газар шилжихээс өмнө буюу 2012 оны аравдугаар сарын  23-нд өөрийн нэр, компани дээр  газрын гэрчилгээ байдаг мэтээр хуурамч гэрчилгээ үйлдэж  нөгөө хүмүүстээ үзүүлсэн байгаа юм. Үүний дагуу газрын эзэн Бат-Очирын Лхагвасүрэнд БНХАУ-ын хөрөнгө оруулалттай компани 150 сая төгрөг урьдчилгаа болгож өглөө гэсэн нотлох баримт байдаг.  Барилга дээр өөр нэг ноцтой зүйл нь хуурамч бичиг баримтан дээр үндэслэн Хот төлөвлөгөөний газар барилга барих зураг төсөл баталж өгсөн байдаг.


–Б.Лхагвасүрэн хуурамч бичиг баримт бүрдүүлс­нээрээ Эрүүгийн хэрэгт буруут­гагдан шалгагдах ёстой шүү дээ. Одоо энэ асуудал ямар шатанд явж байгаа бол?
-Түүнд эрүүгийн хэрэг үүсгэн шалгаж байгаа.  2013 оны тавдугаар сарын 27-ноос түүнд хамаарах бүх хэргийг шалгаж эхэлсэн. Прокуророос хэргийг нь удаа дараа хэрэгсэхгүй болгох шийдвэр гаргаж байсан. Гэвч миний бие өргөдөл гомдол гаргаж удаа дараа шалгуулж байна. Хавтаст хэрэгт энэ хэргийг үйлдсэн гээд хэргээ хүлээчихсэн асуудал ч байдаг. Б.Лхагвасүрэн гэдэг хүний барьж байгаа бичиг баримт болгон хуурамч. Тийм атлаа түүнд хамаарах эрүүгийн хэрэг өнөөг хүртэл шийдэгдэхгүй байгаа. Мөнгөтэй төгрөгтэй, эрх мэдэлтэй хүнд холбогдох хэрэг ингэж уддаг юм байна даа гэж миний бие үзэж байгаа. Түүнийг хууль хяналтын байгууллагыг доромжлоод, хуулийн дээгүүр алхаж яваад харамсч байна. Удахгүй энэ хэрэг бүрэн шийдэгдэх байх. Найман удаагийн хууль бус үйлдэлд Б.Лхагвасүрэн гэх хүнд хуулийн хариуцлага үнэн зөв оногдуулж, хууль бус үйлдлийг нь таслан зогсоож өгнө гэдэгт итгэлтэй байгаа.


Эх сурвалж: "Зууны мэдээ” сонин


Санал болгох

Сэтгэгдэл

АНХААРУУЛГА: Уншигчдын бичсэн сэтгэгдэлд www.ENE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 9318-5050 утсаар хүлээн авна.
>