БОГД УУЛЫН ЗУРГААН АМЫГ АЯЛАЛ ЖУУЛЧЛАЛЫН ЧИГЛЭЛЭЭР ХӨГЖҮҮЛНЭ ГЭВ

180

БОГД УУЛЫН ЗУРГААН АМЫГ АЯЛАЛ ЖУУЛЧЛАЛЫН ЧИГЛЭЛЭЭР ХӨГЖҮҮЛНЭ ГЭВ

 

Байгаль орчин, аялал жуулчла-лын сайд Н.Цэрэнбат өчигдөр мэдээлэл хийлээ. Тус яамнаас энэ сарын 14-21-нд нээлттэй хаалганы өдөрлөг зохион байгуулж иргэд, аж ахуй нэгжүүдээс гомдол, санал хүлээж авахаар болжээ.

Өдөрлөгийн үеэр иргэдээс ирсэн гомдол саналуудыг нэгтгэн байгаль орчин, аялал жуулчлалын салбарын удирдах ажилтны зөвлөгөөнөөр хэлэлцэх юм байна. Энэ талаар Байгаль орчин, аялал жуулчлалын сайд Н.Цэрэнбат "Засгийн газраас энэ оныг хариуцлагын жил болгон зарласантай холбогдуулан харьяа агентлаг, байгууллагуудын үйл ажиллагаатай танилцах, орон даяар БОАЖЯ-ны нээлттэй хаалганы өдөрлөг зохион байгуулахаар ажиллаж байна. Өдөрлөг энэ салбарт болоод ард иргэд,  аж ахуй нэгжүүдэд тулгамдаж буй асуудал, учирч буй хүндрэлийг бүртгэнэ. Мөн үүний дагуу ирсэн саналуудыг нэгтгэж, мэдээллийг боловсруулахаар төлөвлөсөн. Дөрөвдүгээр сард багтаан байгаль орчин, аялал жуулчлалын салбарын удирдах ажилтны зөвлөгөөний зохион байгуулна” гэлээ. Үүний дараа сэтгүүлчдийн асуултад хариулсан юм. 
-Дархан цаазат Богд уулыг тойрч барилга их барьж буй нь нэлээд шүүмжлэл дагуулдаг. Энэ асуудалд танай яамны зүгээс хэрхэн анхаарч байгаа вэ? 
-Бидэнд ирж буй санал гомдлын 80 гаруй хувь нь Богд уултай холбоотой асуудал байна. Тиймээс яамнаас энэ асуудлаар ажлын хэсэг гарч ажиллаж байгаа. Сайдын ажлаа авснаас хойш Богд уултай холбоотой 2-3 зөвшөөрөл цуцалсан. Ер нь цаашдаа энэ асуудлыг хот өөрөө шийдэж байх учиртай юм билээ. Манай яамтай холбоотой Богд уулын зургаан ам байдаг. Энэ амуудад аялал жуулчлалыг хөгжүүлэх чиглэлд салбар яам анхаарч ажиллана.
-Дулааны улирал эхэлж, утаа багассан ч агаарын бохирдлын асуудлыг орхихгүй гэж байсан. Агаарын бохирдлыг бууруулах чиглэлээр ямар ажил хийж байгаа вэ?
-Агаар, орчны бохирдлыг бууруулах үндэсний хороо хуралдаж, тодорхой ажил төлөвлөсөн. Манай яам нийслэлийн Засаг даргын Тамгын газартай хамтран хэд хэдэн ажил хийсэн. Зарим ажил нь судалгааны дүгнэлт дээр байгаа. Энэ долоо хоногт Агаар орчны бохирдлыг бууруулах үндэсний хороо хуралдаж, энэ онд хийх ажлын төлөвлөгөө болон гүйцэтгэх ажлуудтай танилцахаар төлөвлөсөн.  
-Шинэ цэвэрлэх байгууламж барих ажил нэлээд удааширч байна. Одоо ажил нь ямар шатанд явж байгаа вэ?
-Барилга, хот байгуулалтын яаманд шинэ цэвэрлэх байгуулам-жийн бүтээн байгуулалттай холбоо-той ажлын хэсэг байгуулсан. Манай яамнаас цэвэрлэх байгууламжийн байгаль орчны үнэлгээ, лагны үнэр дарах, тээвэрлэх чиглэлээр мэргэжлийн зөвлөгөө өгсөн.

Санал болгох

Сэтгэгдэл

АНХААРУУЛГА: Уншигчдын бичсэн сэтгэгдэлд www.ENE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 9318-5050 утсаар хүлээн авна.