Месут Озил Германы шигшээ багт ахин тоглохгүй хэмээн мэдэгджээ

79
Месут Озил Германы шигшээ багт ахин тоглохгүй хэмээн мэдэгджээБЕРЛИН. /Эн-Эйч-Кэй/. Хөл бөмбөгийн тамирчин Месут Озил арьс өнгөөр ялгаварлан гадуурхах үзлийн улмаас Германы шигшээ багт ахин тоглохгүй хэмээн мэдэгдсэнийг телевизийн "Эн-Эйч-Кэй” суваг уламжлав.
М.Озил нь Германд шилжин суурьшсан Турк цагаачийн гэр бүлд төрж өссөн билээ. Тэрбээр 2014 онд болсон хөл бөмбөгийн ДАШТ-д тус улсын шигшээ багийг түрүүлэхэд ихээхэн үүрэг гүйцэтгэсэн бөгөөд саяхан ОХУ-д болж өнгөрсөн тэмцээнд Германы шигшээ багт мөн тоглосон билээ.
Гэсэн хэдий ч өнгөрсөн тавдугаар сард Туркийн Ерөнхийлөгч Режеп Тайип Эрдогантай хамт авахуулсан зураг нь түүнийг олон нийтийн шүүмжлэлд өртөхөд хүргэсэн ажээ. Р.Т.Эрдоганы улс орноо удирдах дэглэмийг германчууд шүүмжилдэг бөгөөд түүнийг дахин сонгуульд дэвших кампанит ажлын үеэр уг зургийг авахуулсан юм байна.
 
 
Өнгөрсөн ням гарагт М.Озил дээрх зургийн талаар тайлбар хийхдээ "Энэ зураг нь улс төр болон сонгуультай ямар ч холбоогүй бөгөөд төрөлх улсынхаа өндөр албан тушаал бүхий хүнийг хүндэтгэн хамт зураг авахуулсан төдий юм” гэж хэлэв.
Түүний мэдээлснээр, Германы шигшээ баг ДАШТ-ий хасагдах шатны тоглолтод багтаж чадаагүй үеэс эхлэн түүнийг Туркийн цагаач хэмээн арьс өнгөөр ялгаварлан гадуурхаж эхэлсэн байна. Тэрбээр, "Герман ялахад би Герман хүн, харин ялагдахад цагаач болж хувирлаа” гэж хэлэв. Мөн Германы шигшээ багийг ивээн тэтгэдэг компани дэлхийн аваргад зориулсан сурталчилгааны ажлаас түүнийг хассан талаар тэрбээр мөн дурджээ.
 
Э.Хулан
Эх сурвалж: Монцамэ агентлаг

Санал болгох

Сэтгэгдэл

АНХААРУУЛГА: Уншигчдын бичсэн сэтгэгдэлд www.ENE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 9318-5050 утсаар хүлээн авна.