Ю.Кручкин: Монголын сайд, дарга нар автобусаар явж, амьдрал мэдрэх хэрэгтэй

50

Монгол, Орос хоёр улсын төр засгийн өндөр түвшний харилцан айлчлалуудаар олон асуудал яригддаг ч шударгаар хэлэхэд үр дүнд хүрдэггүй гэх байр суурийг монгол судлаач Ю.Кручкин өнгөрсөн есдүгээр сард илэрхийлж байсан билээ. Тэгвэл тэрбээр "Монголын эдийн засгийн чуулган 2019"-ийн үеэр Монголын талаар дараах зүйлийг өгүүлжээ.
Тэрбээр “Нүүдэлчид нэг талаас биеэ даасан хүмүүс. Задгай ухаантай гэж хэлж болно. Шинэ юм хүлээж авахад, энд тэнд бусад улс орнуудаар явахдаа амархан дасдаг. Хятад, солонгосчууд шиг Чайна таун, Кореа таун маягаар амьдрахыг хүсэхгүй. Харьцангуй биеэ даасан амьдралаар амьдарч байна. Улаанбаатарт хүмүүс, машин чихэлдэж байна. Нэгэнт машинууд багтахаа больсон бол ямар нэг аргаар хязгаарлах хэрэгтэй. Цахилгаан хөдөлгүүрт шилжүүлэх хэрэгтэй. Сингапурт Засгийн газрын гишүүн, сайд нь  албаны машингүй. Тэд такси, метро, автобусаар ажилдаа явдаг. Гэтэл Монголд Засгийн газрын ордны хажууд хэчнээн олон машин байна. Улаанбаатарт том дарга нар нэг газарт ойр амьдарч байгаа. Тэндээс нь тусгай хэдэн автобус явуулахад болно. Ядаж амьдрал мэдрэг. Дарга, албан тушаалтнууд утсаа авч сурах хэрэгтэй. Утсаа авч чадаагүй,  ярьж сураагүй юм бол эргээд залга. Монгол дарга нарт ийм соёл байхгүй. Тэр тусмаа сайд хүмүүс чинь танихгүй утаснаас залгасан бол эргэж хэзээ ч залгадаггүй.
Ж.Батмөнх дарга өөрт нь хандсан хүмүүстэй эргэж заавал холбогддог байсан гэсэн. Тэр үед мэдээж гар утас байгаагүй. Гэхдээ хэн нэгэн хүн Ж.Батмөнх даргын туслахтай холбогдсон л бол хэн над руу залгасан бэ гээд эргээд залгадаг, холбоо барьдаг байсан. Ж.Батмөнх дарга бүхэл бүтэн улсын дарга байсан хүн шүү дээ. Иймэрхүү жижиг зүйлийг суралцаж, өөртөө хэвшүүлж эхлэх хэрэгтэй. Хамгийн гол нь янгуучлах хэрэггүй. Сая би Японд очиход Тайфуны үе таарсан. Тэр хүчтэй хар салхины дараа бүх япончууд ажилдаа маш гоё цэвэрхэн цагаан цамцтай, юу ч болоогүй юм шиг ирж байсан. Атаархуу зан нүүдэлчин амьдралаас гаралтай гэж хэлж болно. Гэхдээ энэ зан, энэ дутагдлыг аль болох даван туулах хэрэгтэй юм болов уу. Монголчуудад асар их чадавх, потенциал байгаа гэж би боддог. Гадаадад ажиллаж байгаа монголчууд их сайн явж байгаа шүү дээ.
Сонгуульд залуус, эмэгтэйчүүдийг нэр дэвшүүлэх хэрэгтэй. 90-ээд онд ардчилсан хувьсгал хийж байсан хүмүүс одоо зайгаа тавьж өгөх хэрэгтэй. Тэд багш хийж болно, өөр ямар нэг ажил хийж болно. Залуучуудыг дэвшүүлэх, тэднийг дэмжих хэрэгтэй. Орос оронд ч энэ асуудал чухал байгаа. Хэрвээ Монголд эмэгтэй хүн Ерөнхий сайд юм уу, УИХ-ын дарга, Ерөнхийлөгч болвол нэлээд их зүйл өөрчлөгдөнө гэж бодож байна” гэхчлэн ярьжээ. 
Э.Болорхажид
Эх сурвалж: Zindaa.mn

Санал болгох

Сэтгэгдэл

АНХААРУУЛГА: Уншигчдын бичсэн сэтгэгдэлд www.ENE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 9318-5050 утсаар хүлээн авна.