Шатахуун тээвэрлэж явсан автомашин онхолдсон бас нэгэн осол Төв аймгийн Баяндэлгэр сумын Байдлаг багийн "Тогосын хоолой” гэдэг газар буюу сумын төвөөс баруун зүгт 8 км-т, Багануур дүүргээс баруун зүгт 38 км-т болжээ. Тухайн жолооч "Би Эм Си Си” ХХК-ийн "Норд бенз” загварын ачааны автомашинтай Улаанбаатар хотоос Дорнод аймгийн чиглэлд шатахуун ачин зорчиж явсан бөгөөд улмаар онхолдсоны улмаас 200-300 литр шатахуун асгарсан байна.
Ослын тухай дуудлагыг өчигдөр /2020.07.28/ 08:15 цагт хүлээн авч, нийслэлийн Багануур дүүргийн Онцгой байдлын хэлтэс, Цагдаагийн хэлтсийн алба хаагчид 30 минутын дотор очиж, шатахуун асгарсан 12 м2 тайлбайд элс асган саармагжуулан, онхолдсон автомашиныг 15:45 цагт татан босгож ажиллажээ.
Иймд ард иргэд орон нутгийн замд зорчин явахдаа тээврийн хэрэгслийн аюулгүй байдлыг бүрэн хангаж, хурд хэтрүүлэхгүй байхыг анхааруулж байна.