Д.АМАРБАЯСГАЛАН: Нийтийн эзэмшлийн талбайд зөвшөөрөлгүй барилга барьсан хүмүүсийн жагсаалт гаргах үүргийг Ц.Даваасүрэн сайдад өгсөн
Засгийн газрын Хэрэг эрхлэх газрын дарга Д.Амарбаясгалан мэдээлэл өглөө.
Тэрбээр "Өнөөдрийн Засгийн газрын хуралдаанаар Хөдөлмөр нийгмийн хамгааллын сайд Т.Аюурсайханы өргөдлийг авч хэлэлцсэн. Тэгээд УИХ болон Монгол Улсын Ерөнхийлөгчид танилцуулах бичгийг хүргүүлсэн. Ойрын өдрүүдэд сайдаас чөлөөлөгдөх асуудал нь УИХ-аас орж хэлэлцэгдээд, Ерөнхий сайд захирамж гаргаж, албан ёсоор чөлөөлөгдөхөөр байгаа. Мөн гуравдугаарт нь, өнөөдрийн Засгийн газрын хуралдаанаар Байгаль орчин, аялал жуулчлалын яамныТөрийн нарийн бичгийн дарга Э.Баттулгыг үүрэгт ажлаас нь чөлөөлөх шийдвэрийг гаргасан байгаа. Энэ үндэслэл бол салбарын сайдаас ирсэн саналын дагуу чөлөөлж байгаа. Дөрөвт, сүүлийн хотын түгжрэл, төвлөрөл, хүн амын нягтаршилтай холбоотой олон асуудал Засгийн газрын зүгээс хөндөж тавьж байгаа. Ер нь түгжрэл, төвлөрлийн учир шалтгааныг тогтоох зорилготойгоор өнгөрсөн цаг хугацаанд гаргасан алдаа дутгадлыг олон нийтэд нээлттэй мэдээлэх, нөгөө талаар төрийн авч хэрэгжүүлж байсан бодлогын алдаа дутагдлыг олон нийт болон төрийн түвшинд мэдээллэх үүргийг хүлээж байгаа. Үүнтэй холбогдуулан Барилга хот байгуулалтын сайд Ц.Даваасүрэнд Ерөнхий сайдын зүгээс үүрэг өглөө. Ингэхдээ өнгөрсөн хугацаанд нийтийн эзэмшлийн зориулалттай байсан талбайд барилга байшин барих зөвшөөрлийг өгсөн цаг хугацаа, албан тушаалтан, эрх мэдэлтний жагсаалтыг гаргаж Засгийн газарт мэдээлэх, улмаар олон нийтэд мэдээлэх үүрэг чиглэл юм" гэв.
