Уйгурчуудад хэрэгжүүлэх "Дахин хүмүүжүүлэх” лагерь гэгчийн талаар "Нью Йорк таймс” сонин анх олон нийтэд дэлгэсэн байдаг. "Нью Йорк таймс” сонины задруулсан нууц баримт бичиг нь "Шашны цөөнх болох Шинжаан Уйгурын исламын шашинтнуудыг дахин хүмүүжүүлэх тухай” асуудлыг хөндсөн орон нутгийн эрх баригчдад өгөх зөвлөгөө удирдамж байсан бөгөөд түүнд Шинжаан Уйгурын лалын шашинт иргэдийг дахин хүмүүжүүлэхийн тулд бөөнөөр нь хорих хуаран байгуулах, түүнд явагдах үйл ажиллагааны зорилго, арга зүй, тэр бүү хэл алга болсон хүүхдүүдээ эрж сурагласан эцэг эхчүүдэдийн уур хилэнг намжаахын тулд хэлэх үгийг нь хүртэл зааж өгсөн байсан юм. Жишээ нь, эцэг эхчүүд хүүхдээ сураглаж ирэх юм бол "Засгийн газраас байгуулсан тусгай сургуульд байгаа” гэж хэлнэ. "Тэр сургуульд хамрагдахгүй л бол шашны хэт даврах үзлийн аюулыг хэзээ ч ойлгохгүй” гэж ухуулах, тэгээд ч ойлгохгүй бол хүүхдийг сургуулиас чөлөөлөх эсэхэд эцэг, эхийн зан байдал чухал үүрэгтэй гэдгийг ойлгуулах гэх мэтээр зааварчилсан байсан юм.

БНХАУ бол нэр хүндэд нь сэв суулгаж мэдэх дотоод асуудлаа маш их нууцалдаг орон. Энэ нь нэр хүндэд нь бүр илүү гай болох нь ч бий. Шувууны ханиад, хачигны тахлыг дарсаар байгаад, өөрсдөө хүчрэхээ больсон хойно нь л мэдээлж дэлхий нийтийг сэртхийлгэж байсан. Түвдийн лам нарын бослогын үед амь үрэгдсэн түвд хүний тоог арав дахин багасгаж зарласан. Уйгурчуудыг дахин хүмүүжүүлэх лагерийг ч эрх баригчид нь үгүйсгэдэг боловч үнэн байж болохыг ВВС агентлагийн дэлгэсэн гэрэл зургууд баталж байна. Дашрамд дурдахад, энэ нь ВВС агентлагийн гарт орсон баримтуудын зөвхөн нэг хэсэг нь юм.