Иргэний үг: Эргэн тойрон хар бараан мэдээ
Цаг хугацааны элээнд бид эрхээрээ хатаж тэнэгэрч яваад, зүрхний сургаал айлдвар захиасаа умартаад хоорондоо, ахан дүүсээрээ, ураг удмаараа талцан хуваагдаж, бүүр дайсагнаж дайтаж, нэгнээ хөнөөж сөнөөж явсан гашуун түүхийг туулж ч зовлонг нь эдэлсээн. Тийм л үедээ бид гадны дайснуудын хоол болж, боолын заяанд унаж, гуйлгачин ядуу дорой замаар бэдэрдэг нь бас гашуун үнэн түүх билээ.
Нялх хүүхэд мөлхөж байгаад унаж тусаж хөлд ордог шиг одоо л бид дэнжигнэж байгаа дээрээ жоохон сэрж сэхээрэх хэрэгтэй болоод байна. Хичнээн ч талаас мэрж, сэмэлж, хувааж идэх гэсэн шуналын сарвуу зулгаагаад байгаан! Нийгмийн сүлжээ, олон нийтийн сувгууд, бүх шатанд хүртээж байгаа мэдээллийн урсгал, оюуны дархлааг хордуулах медиа… Гадны хөрөнгө оруулалт, хүний эрх, эрх чөлөө нэрээр тархи угаалт нөлөөлөл!.. Ер нь л бид юманд их автамтгай болжээ. Эргэн тойрон хар бараан мэдээ.
Уурлаж бухимдсан, хоорондоо нэгнээ буруутгасан, зүхсэн, хараасан, хардсан, итгэл алдсан, хар амиа хичээсэн, худлаа хэлж хуурсан, хувиа бодсон, хулгайлсан, улай цайм эх орноо худалдсан, зөвхөн өөрийгөө бодож газар нутгаа ухсан, төрийн сэнтийрүү шунасан, эрх мэдэлд үхэн хатан зүтгэсэн, эрээ цээргүй аашилсан, гүтгэсэн гөрдсөн, шоолсон доромжилсон, муулсан л хүмүүс болж хувирч! Хэзээ бид ингэтлээ доошоо орж, дордож байлаа?! Гүн нойрноосоо сэрээд, сэрүүн зүүднээсээ салаад, үнэний толинд хараад юу болж байгааг ажиглаад ухаарах цаг болжээ бид…
Нам бус, Монгол ардын журамт иргэн Л.Даш
