Б.Жавхлан ЖДҮХС-ын даргаар өөрийн хүнээ томилж байгаад 1 тэрбум 700 сая төгрөгийн зээл авчээ

55

Дархан-Уул аймгаас сонгодсон УИХ-ын гишүүн Б.Жавхлан ЖДҮХСангаас “Пример инвестмент групп” ХХК-иар 900 сая, “Жетте майнинг” ХХК-иар 800 сая төгрөг тус тус авсан гэх дуулиан 2018 оны сүүлээр нэр холбогдож байв.

Эрхэм гишүүн Б.Жавхлан тухайн үед энэхүү мэдээллийг үгүйсгэсэн бөгөөд “ЖДҮ зээл авсан “Пример инвестмент групп” компанитай ямар ч холбоо хамааралгүй” хэмээн мэдэгдэж байв.

Тэгвэл УИХ-ын гишүүн Б.Жавхлан ХХААХҮ-ийн сайд Б.Батзориг, ЖДҮХС-гийн захирал С.Төгсбилэг нарт нөлөөлөл үзүүлж байгаад дээрх хоёр компанид зээл олгуулсан гэх цоо шинэ баримтын мөрөөр хууль хяналтын байгууллага лавхан орж, энэ хэрэгт УИХ-ын гишүүн Б.Жавхланг холбогдуулан шалгаж эхэлжээ.

УИХ-ын гишүүн Б.Жавхлангийн нөлөөнд орсон гэх ЖДҮХС-гийн захирал С.Төгсбилэгийн тухайд 2018 оны нэгдүгээр сарын 11-ний өдрөөс ХХААХҮЯ-ны ЖДҮХС-гийн захирлаар томилогдсон бөгөөд түүнийг энэ ажилд УИХ-ын гишүүн Б.Жавхлан томилуулсан юм байна.

С.Төгсбилэг 2005-2007 онд АНУ-д сурч, ажиллаж байхдаа Б.Жавхлантай танилцжээ. Б.Жавхлан энэ үед АНУ-д Калифорнийн их сургуулийн Риверсайдын хэлний сургууль болон Индианагийн их сургууль суралцаж байжээ. Тэндхийн монголчуудын цуглааны үеэр нэр дурдагдаж буй хоёр эрхэм танилцсан бөгөөд тэд Монголд ирсэн хойноо ч тодорхой хэмжээгээр холбоотой явдаг болжээ.

Ингээд 2018 оны 11-р сард УИХ-ын гишүүн Б.Жавхлан С.Төгсбилэг рүү утсаар залгаж “…ХХААХҮЯ-наас ярьж магадгүй шүү” гэж хэлжээ.

Удалгүй ХХААХҮЯ-ны Төрийн нарийн бичгийн дарга Д.Энхбат С.Төгсбилэг рүү яриад анкет, материалыг нь авсан байгаа юм. Хэд хоногийн дараа “…АТГ-аас урьдчилсан мэдүүлэг хянуулах шаардлагатай. Тэндээс тэнцсэн хариу ирвэл томилогдох боломж гарч болохоор байна” гэсний дагуу ХХААХҮ-ийн сайд Б.Батзориг төд удалгүй тушаал гаргаж С.Төгсбилэгийг ЖДҮХС-гийн захирлаар томилсон байна.

Энэ бүхнээс харахад эрхэм гишүүн Б.Жавхлан ЖДҮХС-ын даргаар өөрийн хүнээ томилж байгаад “Жетте майнинг” ХХК-д 800 сая төгрөг, “Пример инвестмент групп” ХХК-д 900 сая төгрөг, нийтдээ 1 тэрбум 700 сая төгрөгийн зээлийг эрх мэдэл, албан тушаалын байдлаа урвуулж байгаад авч өгсөн болж таарч байна.

Х.Онон

Санал болгох

Сэтгэгдэл

АНХААРУУЛГА: Уншигчдын бичсэн сэтгэгдэлд www.ENE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 9318-5050 утсаар хүлээн авна.