Монгол Улсын Гадаад харилцааны яаманд БНТУ-аас 2020 оны гуравдугаар сарын 17-нд нэгэн ноцтой мэдэгдэл ирүүлсэн талаар мэдээллийн сайтуудад нийтлэгдэж эхэллээ. Мэдэгдэлд "БНТУ, Монгол Улсын хооронд иргэн, аж ахуйн болон эрүүгийн хэргийн талаар эрх зүйн туслалцаа харилцан үзүүлэх тухай гэрээ”-ний хүрээнд БНТУ-ын Бакыркөйн Прокурорын газраас Монгол Улсын нэр бүхий хоёр иргэнийг мансууруулах бодис худалдаалах, гэмт хэрэг үйлдэх үйлдэх зорилготой байгуулагдсан байгууллагад гишүүнээр элсэх гэмт хэрэгтэй холбогдуулан байцаалт авах хүсэлт ирсэн байна. 

Энэ бичиг тус яаманд ирээд 16 хонож байна. ГХЯ хуулийн аль байгууллагад хандсан бол? Монгол Улсаас БНТУ-д суугаа Элчин сайд Р.Болд энэ нөхцөлд удирдлага дороос нь удаа дараа гарч буй мансууруулах бодисын худалдаа, тээвэрлэлттэй холбоотой хэргүүдийн талаар ГХЯ, хууль хяналтын болон тагнуулын байгууллагад мэдэгдэж үүргээ бүрэн дүүрэн биелүүлж чадсан уу гэдэг асуудал заавал хөндөгдөнө. 

Эх сурвалжийн мэдээлснээр Герман улсаас Туркийн прокурорын газарт хандаж хүсэлт гаргасан байдаг. Харин Турк улс Монголд хүсэлт ирүүлж байна. Яагаад Герман улс Монгол Улсын иргэнд холбогдох асуудлыг хэлэлцэхдээ Монгол руу биш Туркт асуудлыг тавьсан юм бол? Мансууруулах бодисын худалдаа тээвэрлэлттэй тэмцэхээр томилогдсон цагдаагийн атташе юу хийж байгаа бол. Монгол Улсаас анх удаа Цагдаагийн атташе Б.Пагвааг ГХЯ-наас Германы ЭСЯ-нд томилогдож очоод удаагүй байхад тус улсын TAG24 вэб сайтад "Монголоос ирсэн атташе гэмт хэрэг илрүүлэх гэж явсан тусгай албаны ажилтныхаа асуудлаар Германы эрх баригчидтай холбоо тогтооход туслаач гэлээ” гэсэн ичгүүрт мэдээлэл гарсан. Уг мэдээллийг Чех улсын Прага дахь Германы ЭСЯ-нд Цагдаагийн атташегаар ажилладаг Уве.Г гэгч оффицер мэдээлсэн байдаг. Өөрөөр хэлбэл Монголын цагдаагийн атташе, Чехийн цагдаагийн атташед хамаг байдгаа яриад, тусламж гуйсан чинь өнөөх нь туслах биш Германы шүүхэд гэрчлэх гэж байгаагаа хэвлэлд мэдээлчихсэн байгаа юм. Энэ бүхэн хангалттай гутамшиг биш үү?

Өнөөдөр Гадаад харилцааны яам маш их ачаалалтай, дэлхийн цар тахлаас иргэдээ эх оронд нь авчрах түүхэн үүрэг гүйцэтгэж буйг нийтээрээ харж байна. Гэвч Монгол Улсын нэр хүндтэй холбоотой, хавтаст хэрэгт дурдсанаар бол гэмт хэргийн бүлэглэлд элсэхээр завдсан дипломат ажилтнуудаа анхаарахгүй байх аргагүй шүү, Д.Цогтбаатар сайд аа! Улс төрийн болон эдийн засгийн, бусад харилцааны ямар ч шалтгаанаар нэр хүнд унагах шалтгаан үүсч болно. Энэ их сорилтын өмнө цэвэр, хариуцлагатай, сонор соргог байх үүднээс удаа дараа хариуцлага алдсан, үүргээ цалгардуулсан Элчин сайд Р.Болдыг эргүүлэн татах цаг болсон юм биш үү?

Нэгэн цагт Тагнуулын байгууллагыг удирдаж байсан түүнийг эдүгээ Элчин сайдаар томилогдоод сонор соргог чанараа алдчихсан гэж бодохгүй байна. Өнөөдөр Унгар, Турк, Герман, Орос, Хятад гээд Монгол Улс хар тамхины тээвэрлэгч, дамжин өнгөрөгч бус хэрэглэгч орон болсныг холбогдох байгууллагууд мэдээлж сануулсаар байгаа билээ. 

Дээр дурдсан БНТУ-ын Бакыркөйн Прокурорын газраас ирсэн бичгийг ч,"БНТУ, Монгол Улсын хооронд иргэн, аж ахуйн болон эрүүгийн хэргийн талаар эрх зүйн туслалцаа харилцан үзүүлэх тухай гэрээ”-г ч Элчин сайд Р.Болд мэдээгүй байх учиргүй. Түүнчлэн одоогоос долоон сарын өмнө миний бие Монгол Улсаас Турк улсад суугаа Элчин сайд Р.Болд хар тамхи наймаалцсан хэрэгт хяналт тавих байтугай эл хэргийн дараа гэр бүлийнхнийг нь Туркийн газар нутгаас "хөөсөн” тухай нийтлэл бичсэн. Гол зорилго, тавьсан асуудал маань "Гэмт хэрэгт холбогдсон ч Монгол Улсын иргэд шүү дээ, ГХЯ-ныхаан! Элчин сайдын "санаачилгаар”, ГХЯ-ныханд "хөөгдсөн” тэр гэр бүл хар тамхины бүлэглэлийнхний гарт амиа алдсан бол Р.Болд хариуцах уу. Тагнуулын ерөнхий газрын дарга асан ийм эрсдлийг тооцож мэдэхгүй гэж үү? Харин өнөөдрийг хүртэл энэ талаар хэн ч хариу өгсөнгүй. Эцэст нь Германы тал Тусгаар тогтносон Монгол Улсын иргэнийг шалгахдаа Туркийн талаас зөвшөөрөл авдаг болжээ. Харин Германд суугаа атташе хэний талд ажиллах, Туркт суугаа Элчин сайд ямар үүрэг хариуцлага хүлээж байгааг олон нийтэд мэдээлэх, шаардлагатай бол эргүүлэн татах нь зүйтэй гэдгийг ГХЯ-нд нийтлэлээрээ дахин сануулъя!

У.Оргилмаа