Винсент Ван Гогийн уран зургийг Нидерландын музейгээс хулгайлжээ
Винсент Ван Гогийн 5 сая фунтын үнэ бүхий 1884 оны уран зургийг Нидерландын музейгээс хулгайлсан хэрэг гарчээ. Хулгайчид ням гарагийн шөнө 3.15 цагт Сингер Ларены музейн урд шилэн хаалгаар нэвтэрч, зөвхөн Ван Гогийн "The Parsonage Garden at Neunen” нэртэй бүтээлийг хулгайлсан байна.
Тухайн үед дохиоллын систем дуугарсан хэдий ч цагдаагийн ажилтнууд ирэхэд гэмт этгээдүүд хэргийн газраас зугтсан байжээ. Дээрх музейг коронавирусийн халдварын тархалтыг зогсоох ажлын хүрээнд гуравдугаар сарын 12-ноос эхлэн түр хугацаанд хаагаад байсан аж.
Цагдаагийн ажилтнууд мөрдөн шалгах ажиллагааг үргэлжлүүлж байна. Тус уран зургийг Интерполын хулгайлагдсан уран бүтээлүүдийн олон улсын жагсаалтад нэмж бүртгэжээ. Сингер Ларены музейн захирал "Гайхалтай уран бүтээлчийн уран зургийг хулгайлсанд туйлын их харамсаж байна. Энэхүү бүтээлийг Гронингерийн музейгээс зээлж тавьсан байсан. Урлагийн бүтээлийг бид бүгд л харах эрхтэй” хэмээн хэлжээ.
Б.Ирээдүй
Эх сурвалж: Guardian
