Үндэсний үйлдвэрлэл маань Хөтөлийн цемент шиг царцчихвал хичнээн үйлдвэр барьж байгуулаад ч нэмэргүй
Сүүлийн 20 жилд Монголчууд анх удаа өөрсдийн хүчээр жилдээ нэг сая тонн цемент үйлдвэрлэх агуу бүтээн байгуулалтыг хийж чадлаа хэмээн хөөрцөглөсөн. Ерөнхий сайд Н.Алтанхуяг нэг гараараа улаан туузнаас атгачихсан амьсгаа өндөртэй нь аргагүй "Ийм үйлдвэр байгуулна гэж байхад нь би итгээгүй. Гэтэл манайхан хоёр жил хүрэхгүй хугацаанд ийм том үйлдвэр барьчихлаа шүү дээ" гэж хоолойгоо цахиртуулан дэвхцээд л ... Эдийн засагчид "Гаднаас цемент авахаа больчихоор жилдээ 100 сая ам.доллар эх орондоо авч үлдэх боломжтой боллоо” гэж нулимсаа арчицгаагаад л ... энэ бүхнийг харж байхад 2004 онд "Их өр”–ийг тэглэсэнээс хойш 2008 онд олимпийн аварга хоёр, гурваараа мэндэлсэнээс хойш манай дарга, сайд нар ингэж баярласан бил үү гэсэн бодол ч төрж байсан билээ. Гэтэл нөгөө том үйлдвэрийн түүхий эд байдаггүй шүү. Сүржин арга хэмжээнээс хойш өчнөөн хоног өнгөрчихөөд байхад Гурвалжингийн гүүрний орчим орших Барилгын материал ачиж буулгах 44-р анги дээр Хөтөлөөс ганц уут ч цемент орж ирээгүй харин хужаагаас оруулж ирсэн цемент пиг дүүрэн байгаа аж. Яагаад энэ билээ гэтэл Хөтөлийн бахархал болсон цемент үйлдвэр дээрээ нэг тонн нь 176,800 төгрөгийн үнэтэй байгаа аж.
