|
Видео

Шинэ мэдээ

АТГ-ын бие даасан байдлаа авч үлдэх хүсэл эрмэлзлийг үнэлжээ

АТГ-ын бие даасан байдлаа авч үлдэх хүсэл эрмэлзлийг үнэлжээ

 

АТГ-т ажилласан Европын аюулгүй байдал, хамтын ажиллагааны байгууллага /ЕАБХАБ/-ын төлөөлөгчдийн айлчлалын талаар тус байгууллагын Хэвлэл, олон нийттэй харилцах албанаас дараах мэдээллийг нийтэлжээ.

Монгол Улсын Авлигатай тэмцэх газрын урилгаар ЕАБХАБ-ын Эдийн засаг, байгаль орчны чиглэлийн үйл ажиллагааны газраас хийсэн авлигатай тэмцэхэд шаардлагатай нөхцөлийг тодорхойлох гурван өдрийн ажлын айлчлал өнөөдөр өндөрлөлөө. Ажлын айлчлалын хүрээнд Авлигатай тэмцэх газар, Улсын ерөнхий прокурорын газар, Цагдаагийн ерөнхий газрын Эдийн засгийн гэмт хэрэгтэй тэмцэх хэлтэс, "Транспэрэнси интернэшнл” байгууллагын Монгол дахь салбар, Монголын Бизнес эрхлэгчдийн зөвлөл, Үндэсний худалдаа, аж үйлдвэрийн танхим, Дэлхийн банкны суурин төлөөлөгчийн газар зэрэг байгууллагын 30 гаруй төлөөлөгчтэй уулзаж, тус улсын эрх зүйн орчин, авлигатай тэмцэх байгууллагын талаар ярилцаж, сайжруулахад шаардлагатай зөвлөмжүүдийг өгч, цаашид авч хэрэгжүүлэх арга хэмжээний талаар санал солилцлоо.

ЕАБХАБ-ын Эдийн засгийн ахлах мэргэжилтэн Андрей Мунтеан хэлэхдээ "Монгол Улсын хувьд авлига чухал асуудлуудын нэг болсон ч Авлигатай тэмцэх газрын удирдлага болон албан хаагчдын бие даасан байдлаа авч үлдэх хүсэл эрмэлзэл, бүх төрлийн авлигатай тэмцэх, түүнээс урьдчилан сэргийлэх чиглэлээр бодлого боловсруулан хэрэгжүүлж байгааг бид өндрөөр үнэлсэн” гэв.

Түүнчлэн АТГ-ын дэд дарга Ц.Нямдоржийн хэлснээр "Авлигын эсрэг хууль тогтоомжийг хэрэгжүүлэхээр Авлигатай тэмцэх газар цогц байдлаар ажиллаж байгаа. Манай чадавхийг дээшлүүлэх чиглэлээр айлчлалын үеэр ярилцсан асуудлыг хамтран хэрэгжүүлж, ЕАБХАБ-тай хамтран ажиллахад бид бэлэн” гэж мэдэгдлээ.

Ажлын айлчлалын төгсгөлд олон талын төлөөлөл оролцсон зөвлөгөөнийг ЕАБХАБ-ын төлөөлөгчид зохион байгуулж, АТГ-ын чиг үүрэг, бие даасан байдлыг нэмэгдүүлэх, бэхжүүлэх, түүнд шүүх засаглал, хууль сахиулах байгууллагуудын гүйцэтгэх үүрэг, иргэний нийгэм болон хувийн хэвшлийн оролцооны талаар зөвлөлдсөн.

Сэдэвчилсэн ярилцлагын үеэр намын санхүүжилтийн зохицуулалтыг сайжруулах, төрийн байгууллагын албан тушаалтнуудын хөрөнгө, орлогын мэдүүлгийг бүрдүүлэх, хянан шалгах чадварыг нэмэгдүүлэх, худалдан авах ажиллагааны үйл явцыг улам боловсронгуй болгох, мөнгө угаахтай тэмцэх болон хулгайлагдсан эд хөрөнгө буцаах ажлыг бэхжүүлэх шаардлагатай болохыг онцолсон байна.

Уулзалтад оролцсон төлөөлөгчдөд шинээр хэвлэгдсэн ЕАБХАБ-ын "Авлигатай тэмцэх гарын авлага”-ыг мөн тараажээ. Ийм төрлийн танилцах ажлын айлчлалыг Эдийн засаг, байгаль орчны чиглэлийн үйл ажиллагааны газар 2016 оны 1 дүгээр сараас хойш 8 гишүүн улс оронд хийсэн. Танилцах айлчлал хийснээр холбогдох байгууллагуудад ЕАБХАБ-ын удирдан явуулдаг чадавх бэхжүүлэх загварын сайн засаглал дахь тулгарсан асуудлуудын талаар нээлттэй, үр өгөөжтэй ярилцах боломжийг олгодог гэжээ.

Эх сурвалж: АТГ

Сэтгэгдэл

АНХААРУУЛГА: Уншигчдын бичсэн сэтгэгдэлд www.ENE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 9318-5050 утсаар хүлээн авна.