Сонгуулийг тойрсон хошин шог
Сонгуулийн сурталчилгаа эхлээд өнөөдөр гурав дахь хоног нь болж байна. Энэ хугацаанд улс төрийн соёлгүй, хууль зөрчсөн болон мэдрэмжгүйгээсээ болж хошин шогийн жүжигчдийг ажилгүй болгох шахсан үйлдэл нэг биш гарлаа. Сонгогчийг доромжилсон, бүдүүлэг үйлдэл ихээр гарах боллоо. Тэдгээрээс түүвэрлэн хүргэж байна.
Тухайлбал, төрсөн эцгийнхээ нэрийг ч зөв бичиж чадахгүй хоёр хүн УИХ-ын сонгуульд өрсөлдөж байх юм.
Уг нь алдах гэж алдаагүй л байх. Хэвлэгдэхээс нь өмнө хянаж амжаагүй биз. Цахим хуудсаа нээхдээ ч гэсэн анзааргагүй нь дэндээд алдсан байх. Гэхдээ л төрсөн эцгийнхээ нэрийг буруу бичиж байгаа хүнээр хууль санаачлуулж, засуулна гэдэг "хэцүү” дээ…
Тоглоом нь шоглоом болсон нэр дэвшигчийн сурталчилгааны нэгэн жишээ бол энэ.
Наргиан хийж ингэж авахуулж болно. Гэхдээ сонгогчийг ингэж доромжилж болохгүй. Өөрийгөө л таниулж байвал ямар аргаар гэдэг нь сонин биш гэж бодож байвал сонгогчид тэнэг биш гэдгийг нэр дэвшигчид ойлгох хэрэгтэй.
Үүнээс гадна тэжээлгэх гээд байгаа, гэр цэвэрлэх гээд байгаа нь тодорхойгүй хоёр хүн МАХН-аас нэр дэвшээд байгаа.
Танил дотно санагдах гэж, өөрчилнө гэсэн санааг агуулж байгаа бололтой юм. Угийн шооч ард түмэн гэдгийг ухамсарлаад тэд арай өөр сонгуулийн уриа үг сонгож болох л байсан. Гэр цэвэрлэж өгөх гэж байгаа юм уу, хоёр эхнэртэй хууль батлагдсан юм уу гэж ойлгож болохоор байна. Экс тэргүүн хатагтай сонгуулийн сурталчилгаандаа нөхрийнхөө хамт авхуулсан зургаа ашиглаж байгаа нь бас л "зэвүүцэл” төрүүлж байгаа юм.
Ухаж ойлгоход төвөгтэй сурталчилгаа хүртэл байх юм.
Тэднээс ч доор ухамсаргүй үйлдлийг зарим нэг улс төрийн нам гаргаж байгаа. Тодруулбал, санал хуваах болон сонгогчийг будлиулах зорилгоор сонгогдох магадлал өндөр нэр дэвшигчтэй ижил нэртэй хүнийг тухайн тойрогт нэр дэвшүүлж байгаа үйлдэл юм. Тухайлбал, МАН-ын Сүхбаатар дүүрэгт МАН-ын удирдах зөвлөлийн гишүүн Ц.Цолзолмаатай ИХН-ын Б.Цогзолмаа нэг тойрогт нэр дэвших нь. Иргэний хөдөлгөөний намын Б.Цогзолмаагийн хувьд Монголын залуучуудын холбоонд ресепшн хийдэг байна. Мөн Чингэлтэй дүүргийн 63 дугаар тойрогт өмгөөлөгч Г.Батбаяр, Р.Батбаяр нар өрсөлдөнө. Р.Батбаяр нь БНН-аас нэр дэвшиж байгаа Монголын хөрөнгийн биржийн мэргэжилтэн. Өөрөөр хэлбэл үлгэр дууриалал авмаар хүмүүстэй нь амьдаа нөхдүүдээр нам нь "туг тахиж” намтар чинь баялаг болно гэх мэтээр толгой угаасан байж болзошгүй юм. Хэдийгээр нэр дэвших, сонгох, сонгогдох нь хүний эрх ч гэлээ Монголчуудыг тэнэг мэт ийнхүү басамжилсан үйлдэл хийж байгаад сонгогчид эгдүүцэж байгаа.
Уг нь ухамсартай, ёс зүйтэй, зөвөөр өрсөлдөж, УИХ-ын гишүүн болбол хэн хэндээ дараа нь нэр цэвэр дээ… Нэр хугарахаар яс хугар гэж ардын үг байдгийг нэр дэвшигчдэд сануулъя.
М.Мөнгөн
Эх сурвалж: www.Dorgio.mn
