У.Хүрэлсүх: МАН бол 95 жилийн төр удирдсан туршлагатай нам
МАН-аас УИХ-ын сонгуулийн 11-р тойрог буюу Говь-Алтай аймагт нэр дэвшигч Ш.Раднаасэдийг дэмжиж У.Хүрэлсүх тэргүүтэй МАН-ын сонгуулийн төв штабын гишүүд 2016 оны 6-р сарын 24-26-ны өдрүүдэд Говь-Алтай аймагт ажилалаа. Алтай хотод болсон уулзалтад МАН-ын Удирдах Зөвлөлийн гишүүн, Монгол Улсын Шадар сайд асан У.Хүрэлсүх нэр дэвшигчээ дэмжиж үг хэлэхдээ, "Өнгөрсөн дөрвөн жилд эрх баригчид ард түмнээ ядууруулж, эдийн засгаа унагаж, хоорондоо эвдрэлцэж өөрсдийн үнэн дүр төрх, бодит байдлаа хангалттай харуулсан” гэлээ. Цаашид унасан эдийн засаг, ядуурсан түмний амьдралыг дээшлүүлэхийн тулд 95-н жилийн турш Монгол Улсыг удирдаж, тусгаар тогтнолоо батлан хамгаалж ирсэн улс төрийн тулхтай, эв нэгдэлтэй, ууган хүчин МАН болон түүний нэр дэвшигчдийг багаар нь дэмжихийг уриаллаа.
Нэр дэвшигч Ш.Раднаасэд хэлэхдээ "Ард түмнээ алагчлан үздэггүй, аймаг угшил, үзэл бодлоор нь ялгаварлан гадуурхдаггүй, алслагдмал аймгуудийг хөгжлийн бодлогоор тэтгэсэн тэр л улс төрийн хүчин Монгол Улсын язгуур эрх ашгийг хамгаалж, эх орондоо хөгжил цэцэглэлтийг авчирч чадна" гэсэн юм.
