|
Видео

Шинэ мэдээ

Хоёр Солонгосын хөлөг онгоцууд харилцан гал нээжээ

СӨҮЛ. /NHK/. Солонгосын хойгоос баруун тийш тэнгист хоёр Солонгосын хөлөг онгоцууд өнөө өглөө харилцан гал нээсэн тухай Өмнөд Солонгос мэдэгдлээ.

Хүн гэмтэж бэртсэн, ямар нэг хохирол учирсан гэсэн мэдээлэл алга байна.

Өмнөд Солонгосын цэргийн албаны хүмүүсийн мэдэгдсэнээр, өнөө өглөө 09:50 цагт Ёнпёндо арлын усан хилийг Умард Солонгосын эргүүлийн хөлөг онгоц давжээ.

Өмнөд Солонгосын цэргүүд радиогоор анхааруулга өгч, анхааруулан нэг удаа буудсан аж.

Умард Солонгос хариу гал нээсний дараа Өмнөд Солонгос дахин гал нээжээ.

Өмнөд Солонгосын армийн мэдэгдсэнээр, Умард Солонгосын хөлөг онгоц таван минутын дараа ухарсан байна.

Умард Солонгос идэвхтэй дипломат байр суурь баримтлахыг оролдож байгаагаа харуулж буй энэ үед хоёр тал харилцан гал нээлээ. Тус улсын Гадаад харилцааны сайд сүүлийн 15 жилд анх удаа НҮБ-ын Ерөнхий Ассамблейд оролцсон билээ.

Өнгөрсөн ням гарагт Умард Солонгосын удирдагч Ким Жөн Уны ойрын туслахууд Өмнөд Солонгост Азийн наадмын хаалтын ёслолд оролцож, удахгүй хоёр улсын хооронд дээд түвшний хэлэлцээ хийхээр зөвшилцсөн юм.

Цэргийн өдөөн хатгалга, энэ мэт үйлдлүүдийн ард юу байгааг Өмнөд Солонгосын Засгийн газар нухацтай судалж, дүн шинжилгээ хийх төлөвтэй байна.

Г.Доржханд montsame

Сэтгэгдэл

АНХААРУУЛГА: Уншигчдын бичсэн сэтгэгдэлд www.ENE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 7711-0505 утсаар хүлээн авна.