Шинэ сайд: Ц.Цолмон, Д.Зоригт, Л.Пүрэвсүрэн, Р.Жигжид
Сангийн сайдад УИХ-ын гишүүн Д.Зоригт, Зам тээвэр, барилга хот байгуулалтын сайдад УИХ-ын гишүүн Ц.Цолмон, Гадаад харилцаа, эдийн засгийн хамтын ажиллагааны сайдад Ерөнхийлөгчийн Аюулгүй байдал, гадаад бодлогын зөвлөх Л.Пүрэвсүрэн, Уул уурхай, эрчим хүчний сайдад Уул уурхайн яамны Төрийн нарийн бичгийн дарга Р.Жигжид нарыг санал болгожээ. Өчигдөр үдээс хойш Ардчилсан намын Гүйцэтгэх зөвлөл хуралдаж, шинэ бүтцийн сайд нараар ажиллах дээрх хүмүүсийг тодорхой болгов. Дараа нь УИХ дахь АН-ын бүлэг үүнийг авч хэлэлцээд гишүүд дэмжсэн байна. Засгийн газрын хуралдаанаар нэр дэвшигчдийг дэмжиж УИХ-д өргөн барихаар болжээ. УИХ-ын хоёр гишүүн, гаднаас хоёр сайд шинээр томилохоор оруулж байгаа аж. Мөн үүн дээр Эрүүл мэндийн сайдыг солих тухай мэдээлэл яваа. Н.Удвалын оронд Л.Жамбалжавыг томилуулах санал бийг зарим эх сурвалж мэдээлсэн. Шинээр нэр дэвшүүлж буй сайд нарыг өчигдөр өргөн барьсангүй. Өнөөдөр өглөө УИХ-ын даргад өргөн барихаар болжээ.
Эх сурвалж: www.assa.mn
