Шүүхийн ерөнхий зөвлөлийн Гүйцэтгэх нарийн бичгийн даргаар О.Амгаланбаатарыг томилжээ. О.Амгаланбаатар нь 1975 онд Улаанбаатар хотод төрсөн. 1993 онд Нийслэлийн 93 дугаар сургууль, 1993-1998 онд Шинжлэх ухаан техникийн их сургуулийг Инженер, технологич мэргэжлээр, 2005-2008 онд Тагнуулын академийг Эрх зүйч мэргэжлээр, 2008-2010 онд Удирдлагын академийг Төрийн удирдлагын менежер, 2016-2017 онд Төрийн захиргааны менежментээр тус тус төгссөн. Инженер, технологич, эрх зүйч мэргэжилтэй.

Тэрбээр 1999-2000 онд Үндэсний архивын газарт техникч, 2000-2003 онд Нийслэлийн Эрүүл ахуй, халдвар судлалын албанд шинжээч, 2003-2009 онд Мэргэжлийн хяналтын газарт Улсын байцаагч, 2009-2012 онд Хүнс, хөдөө аж ахуй, хөнгөн үйлдвэрийн яаманд Газрын орлогч дарга, 2013-2014 онд "Хүнс, хөдөө аж ахуйн эрдэм шинжилгээ, судалгааны хүрээлэн” ТББ-д Удирдах зөвлөлийн дарга, 2014 онд УИХ-ын тамгын газарт референт, 2014-2016 онд Хүнс, хөдөө аж ахуйн яаманд Төрийн захиргааны удирдлагын газрын дарга, 2016-2018 оны есдүгээр сар хүртэл Хүнс, хөдөө аж ахуй, хөнгөн үйлдвэрийн яамны харьяа Аймаг дундын отрын бэлчээр ашиглалтын захиргааны даргаар тус тус ажиллаж иржээ.

Шүүхийн ерөнхий зөвлөлийн нийт ажилтны хурлын үеэр Шүүхийн ерөнхий зөвлөлийн дарга Н.Лүндэндорж "Ажлын алба бол Шүүхийн ерөнхий зөвлөлд үйлчилдэг бөгөөд чадавх, бүтээмж, үр нөлөө, хариуцлагад нь Шүүхийн ерөнхий зөвлөлийн дарга, гишүүд анхаарч байдаг. Гүйцэтгэх нарийн бичгийн даргаар томилогдсон О.Амгаланбаатар нь 17 жил төрийн захиргааны байгууллагад ажиллаж, туршлага хуримтлуулсан, мерит зарчмаар ажиллаж ирсэн гэдгийг онцолъё” гээд ажлын амжилт хүссэн байна.

Шүүхийн ерөнхий зөвлөлийн Гүйцэтгэх нарийн бичгийн дарга О.Амгаланбаатар "Хүнд итгэл хүлээлгэж, хариуцлага нэхэх зарчмаар ажилладаг. Шүүхийн ерөнхий зөвлөлөөс гарч буй тогтоол, шийдвэр бүрийг хуулийн хүрээнд бүх шатанд алдаа мадаггүй гаргахын төлөө хичээж ажиллах болно. Та бүхэнд ажлын амжилт хүсье” хэмээн хэлжээ.

Д.ТУЯА