НИТХ-ын дарга асан Т.Билэгт, УИХ-ын гишүүн асан Ц.Батбаяр нарт холбогдох шүүх хурал Дүүргийн Эрүүгийн хэргийн нэгдүгээр шүүхэд боллоо. Тэднийг Эрүүгийн хуулийн тусгай ангийн 150.3, 263.2-т зааснаар буруутган шүүж яллалаа.

     Хуралдаанд Т.Билэгт, Ц.Батбаяр нар хүрэлцэн ирж оролцсон. Мөн хохирогчоор Нийслэлийн өмч хувьчлалын мэргэжилтэн, хуулийн зөвлөхүүд оролцсон юм. Учир нь Т.Билэгт, Ц.Батбаяр нар нь нийслэлийн засаг дарга өмч хувьчлалын комиссын даргаар ажиллаж байхдаа албан тушаалаа урвуулан ашиглаж, 605 сая төгрөгийн үнэлгээтэй Өргөө зочид буудлыг татан буулгасан.

     Улмаар МАХН-ын дарга Н.Энхбаярын хүү Батшугарын нэр дээр байгуулсан "Хар Дун” компанийн өмчлөлд шилжүүлэн үрэгдүүлж, Нийслэлийн өмчид их хэмжээний хохирол учруулсан, мөн хоёр тэрбум 125 сая төгрөгийн үнэлгээтэй Улаанбаатар таймс сониныг хууль бусаар Н.Энхбаярын төрсөн дүү Энхтуяагийн Медиа холдинг компани, тус сонины эрхлэгч Чулуунбаатарын нэрээр хувьчилж, улмаар Н.Энхбаярын үүсгэн байгуулсан Эскон компанид шилжүүлж үрэгдүүлсэн хэрэгт буруутгагдаж байгаа юм.

     Н.Энхбаяр, энэхүү хэргийннхээ төлөө шүүхээс 2.6 жилийн хорих ял сонссон ч ерөнхийлөгчийн уучлалаар суллагдсан. Хэргийн мөрдөн байцаалтын явцад Билэгт нь гадаад улс руу оргон зайлсанд тооцогдож  хэргийг нь түр түдгэлзүүлж, Билэгтийг Интерполоор эрэн сурвалжилж байсан юм. Харин Билэгтийн гадаадад оршин суух хугацаа дууссанаар Билэгт өнгөрсөн оны наймдугаар сард эх орондоо ирсэн. Түүнийг ирмэгц ШШГЕГ-ын харьяа цагдан хорих 461 дүгээр ангид саатуулж байгаад биеийн байдал муу гэх шалтгаанаар батлан даалтад гаргаад байсан юм. Харин шүүхээс УИХ-ын гишүүн асан Ц.Батбаярыг гэм буруутайд тооцож 2.1 жилийн хорих ял чанга дэглэмтэй хорих ангид эдлүүлэх шийдвэр гаргалаа. Т.Билэгтийг гэм буруутайд тооцсон ч 2009 оны Өршөөлийн хуульд хамруулан хэргийг нь хэрэгсэхгүй болгож шийдвэрлэсэн байна.

http://undesten.mn/s/51376