Хар тамхины хэрэгт холбогдуулж Монголын консулын хоёр ажилтныг Турк Улсад шалгаж байна
Энэ оны хоёрдугаар сард Турк улсад хар тамхины томоохон бүлгийн гишүүдийг яллах шүүх хурал болсон юм. Тэд Монгол зэрэг орнуудын дипломат эрх ашиглан бусад улс орнуудын хилийг хялбархан давж, хориотой бараагаа зөөвөрлөдөг уг бүлэглэлээс 25 хүнийг хэрэгт холбогдуулан шалгаж, 1 тонн орчим хар тамхи, мансууруулах бодис хураан авсан байна.
Timeturk.com сайтад энэ хэргийн үйл явц, гүйцэтгэх ажиллагаа, холбогдсон этгээдүүдийн талаар мэдээлэхдээ “2018 оны 12 дугаар сарын 17-нд Туркийн Цагдаагийн газрын Мансууруулах гэмт хэрэгтэй тэмцэх хэлтсийн тайланд “гадаадад амьдардаг Нажи болон Абдулла нар Европын орнуудаас хар тамхи илгээдэг байсныг хүлээн авч Истанбулаар дамжуулан тараадаг” тухай мэдээллийн дагуу хэрэг үүсгэн шалгасан аж.
Улмаар тэдний гар утсыг шүүж, хамсаатнуудыг илрүүлсэн байна. Олон хоногийн мөрдөн шалгах ажиллагааны явцад 2019 оны нэгдүгээр сарын 10-ны өдөр Истанбул дахь Монголын Ерөнхий консулын газрын 34 CC 3221 дугаартай автомашинаар хилийн чанад руу хар тамхи зөөвөрлөснийг тогтоосон байна.
Үүнээс гурван сарын дараа буюу тавдугаар сарын 3-нд Монголын дипломатчид 70 кг героин тээвэрлэж яваад Германы Дрезден хотын цагдаад баригдсан билээ.
Консулын ажилтан Б.Баттүшиг “Монголын тагнуулын гүйцэтгэх ажиллагаа явуулж байсан” гэх мэдүүлэг өгсөн нь гаднынхны гайхширлыг төрүүлээд байсан юм. Тэд Б.Баттүшигийн гар утасны блокийг гаргаж, мэдээллийг унших шаардлагатай болсон тул хэрэг шийдвэрлэх хугацааг хойшлуулаад байгаа юм.
Тэгвэл одоо Истанбул дахь дэд консул Б.Энхмөнх болон ажилтан Б.Алтансүх нарыг Туркийн цагдаагийн газар дээрх хэрэгт холбогдуулан шалгаж байна.
Тус улсын Эрүүгийн хуульд зохион байгуулалттай хар тамхи үйлдвэрлэх, худалдаалах хэрэгт 1-40 жилийн хорих ял оноодог. Одоо илрүүлэн шалгаж, нотлон тогтоосон дээрх хэрэгт холбоотой таван этгээдэд 40 жил, хоёрт нь 33 жил, зургаад нь 1-18 жил, найман яллагдагчид 1-3 жилийн ял тус тус төлөвлөжээ. Монголын дипломатууд холбогдсон нь тодорхой болсон уг хэргийн талаар холбогдох байгууллагууд ямар нэг тайлбар өгөхөөс татгалзсаар байгаа нь улс төрчид болон хуулийн өндөр албан тушаалтнуудын хүүхдүүд хэрэгтэн болох нөхцөл үүсээд байгаатай холбоотой. Аалзны тор мэт томчуудыг бүрхсэн уг сүлжээг Монголд биш, шударга хуультай гадны улсад л таслах бололтой” гэж мэдээлсэн талаар өнгөрөгч долоо хоногт “Засгийн газрын мэдээ” сонин нийтэлжээ.
