Энэ удаагийн хаврын чуулган хаахын өмнөхөн Эдийн засгийн хөгжлийн яамны Төрийн нарийн бичгийн даргын өрөөнөөс чагнах төхөөрөмж илэрсэн. Энэ тухай Ерөнхий сайд Н.Алтанхуяг УИХ-ын чуулганы нэгдсэн хуралдаанд оролцох үеэрээ хэлсэн нь бүр ч гайхалтай үйл явдал болсон юм.
Тэрхүү чагнах төхөөрөмжийг АТГ-ынхан тавьсныг ТЕГ-ын дарга Б.Ариунсан Ерөнхий сайдад өөрийн биеэр бараалхаж дуулгасан гэж байгаа. Аль ч улсын хуулийн байгууллага мөрдөж байгаа хэргийнхээ хүрээнд прокурорын зөвшөөрлөөр хэнийг ч тагнаж чагнах эрхтэй байдаг. Энэ эрх манайд ч үйлчилдэг. Гэхдээ энэхүү ажиллагаа мэргэжлийн түвшинд, маш өндөр нууцлалтай явагддаг.

Харамсалтай нь есөн жилийн түүхтэй шинэхэн залуухан байгууллага болох  АТГ-ынхан ЭЗХЯ-ны нэгэн өрөөнд чагнах төхөөрөмжөө суурилуулахдаа алдаа гаргажээ. Энэ алдааг нь 90 жилийн түүхтэй Тагнуулийн ерөнхий газрын дарга Б.Ариунсан Ерөнхий сайдад мэдээлж, түүнээс ч том  алдаа гаргасан. Түүнийг нь Ерөнхий сайд олон нийтэд мэдээлснээрээ бүр ч байж боломгүй алдаа гаргав. Чухам ямар алдаа гаргаснаа ойлгосон эсэхийг бүү мэд. Учир нь тухайн үед яг л "дайсан" илрүүлсэн "Үндэсний баатар” мэт сүрийг үзүүлж байсныг олон хүн харсан.

АТГ-аас тавьсан чагнах төхөөрөмжийн талаар өнгөрсөн хугацаанд хангалттай мэдээллэсэн болохоор энд нуршаад яах вэ. Харин ТЕГ-ын дарга Б.Ариунсан, Ерөнхий сайд Н.Алтанхуяг нар энэхүү мэдээллийг нийтэд хүргэснээрээ ямар алдаа гаргасан  талаар товч өгүүлье.   
АТГ бол Төрийн байгууллага. Тиймдээ ч тус байгууллагын хийж буй үйл ажиллагаа бүгд "Монгол төрийн нэрийн өмнөөс” гэсэн хаягтай байдаг. Гэвч нууц ажиллагааны явцад тэдний гаргасан алдаа дутагдлыг нийтэд мэдээлнэ гэдэг нь өөрөө Төрийн нууцыг задалсан хэрэг болж байгаа юм.

Төрийн нууцын тухай Монгол Улсын хуулийн 14 дүгээр зүйлд төрийн нууцыг хариуцаж байгаа төрийн бүх шатны байгууллага нь салбарынхаа хэмжээнд хадгалагдаж байгаа болон бусад байгууллагын хариуцаж буй өөрийн салбарт хамаарах төрийн нууцын ашиглалт, хамгаалалтад хяналт тавих бүрэн эрхийг хэрэгжүүлэхээр заасан байдаг. Төрийн хуулиар хүлээсэн энэ бүрэн эрхийг байгууллагын удирдлага болон түүний удирдлага дор төрийн нууцыг хамгаалах нэгж, эсхүл нууцын ажилтан хариуцан хэрэгжүүлж төрийн нууцын хадгалалт, хамгаалалт, ашиглалтын байдалд өдөр тутам хяналт тавьж, хагас жил, бүтэн жилээр үзлэг, тооллогыг зохион байгуулах шаардлагатай  байдаг байна.

Харин Төрийн нууцыг задалсан этгээдийг Монгол Улсын Эрүүгийн хуулийн Тусгай ангийн 87 дугаар зүйлд заасны дагуу яллах хуулийн заалттай. Тус хуулийн  87 дугаар зүйлийн 1 дэх хэсэгт "Төрийн нууцад хамаарах мэдээ, баримт бичиг, эд зүйл, обьект, үйл ажиллагааг итгэмжлэгдэн хариуцсан буюу албан тушаал, ажил үүргийн хувьд мэдсэн этгээд задруулсан нь эх орноосоо урвах, тагнуул хийх гэмт хэргийн шинжгүй бол таван жил хүртэл хугацаагаар хорих ял шийтгэнэ” гэж заасан байдаг аж.

Тэгэхээр Эрүүгийн хуулийн энэ заалт, тодруулбал 87 дугаар зүйлийн 1 дэх хэсгийг Ерөнхий сайд маань ч, Тагнуулын ерөнхий газрын дарга ч  зөрччихлөө. Ялангуяа Ерөнхий сайдын хэрхэн энэ тухай зарлан мэдээлж буйг тухайн үед УИХ-ын чуулганы нэгдсэн хуралдааныг сонирхож байсан бүх хүн нүдээр үзэж, чихээр сонссон. Одоо яах вэ. Ерөнхий сайд учраас Эрүүгийн хуулийг зөрчиж болно гээд өнгөрүүлэх үү. Эсвэл Монгол Улсын иргэн бүрт хууль ижил тэгш үйлчлэх гэж заасан  Үндсэн хуулиа дагах уу.