Ч.Сайханбилэг хаанаас санхүүжиж, АНУ-д амьдарч буйг шалгаж байгаа гэв
УИХ-ын гишүүн, Хууль Зүй, Дотоод Хэргийн Сайд Х.Нямбаатар "Шувуу" ажиллагааны талаар мэдээлэл хийлээ.
Энэ үеэрээ тэрээр: "Ойрын үед БНСУ-аас хэд хэдэн хүнийг тус улсын хууль сахиулах албадтай хамтран албадан ирүүлэх ажлууд хийгдэж байгаа. Одоогоор нэр усыг нь тодорхой хэлэх боломжгүй байна. Н.Удаанжаргалтай холбоотойгоор хууль сахиулах байгууллагууд, АТГ, ЦЕГ, Эрүүгийн цагдаагийн алба холбогдох улс орнуудын хууль сахиулах байгууллагуудтай хамтран ажиллаж байгаа. Тодорхой шилжүүлэн авах ажиллагаа хийгдсэн үед энэ талаар мэдээлэл өгөх нь зөв байх. Гадаадад орогнож байгаа хүмүүсийн мэдээллийг үнэн зөв эсэхийг тухайн улсын хууль сахиулах байгууллагуудтай эрхзүйн талаар харилцан туслалцах гэрээ болон авлигын эсрэг конвенци, интерполын шугамаар харилцан мэдээлэл солилцоод явна.
АТГ байгуулагдаад 17 жил болоход өмнө нь шилжүүлэн авсан тохиолдол огт байгаагүй. Бидний эмээгээд байсан зүйл дээр бусад улс орнуудын хууль сахиулах байгууллагууд харилцааны тал дээр дэвшил гарсан байна.
Ердөө 20 гаруй улс оронтой 30 орчим харилцан туслалцах гэрээнээс өөр зүйл байгуулаагүй гэж санаа зовж байсан. Нөгөө оргон зайлсан хүмүүс маань магадгүй Монголчуудаасаа зугтаж амьдрахад хэцүү болж байгаа шүү дээ. Монголчууд энд тэндгүй амьдарч байна. Тийм учраас гадаадад амьдарч байгаа Монголчуудаас мэдээлэл авах саналыг ажлын хэсгээс оруулж, Засгийн газраас шийдвэр гарсан. Бид хүн бүрт адил тэгш, ялгамжгүй харьцах зарчим барьж байгаа.
АНУ-ын Элчин сайд, Монгол улсад байгаа АНУ-ын аюулгүй албаны ажилтнуудтай удаа дараагийн уулзалт хийж байгаа. Энэ талаар хүсэлтүүдээ тавьж байгаа. Бусад хүмүүст авч хэрэгжүүлж байгаа арга хэмжээнүүдээ Ч.Сайханбилэгт ч мөн авч байгаа.
АНУ-д тийм хямдхан амьдарч чадахгүй, бидний авсан мэдээллээр. Энэ хүн хаанаас санхүүжиж байна гэдэг талаар мөрдөх алба ажлууд хийж байгаа. Энэ хүмүүсийг дуудаж ирүүлэх арга хэмжээнүүдийг бүх талаар авч хэрэгжүүлнэ. Үр дүн гарна гэдэгт итгэлтэй байгаа. " гэв.
