Л.Гансүхийн схем буюу тэрбээр туслах, дүү нарын хамт хоригджээ

1714

Л.Гансүхийн схем буюу тэрбээр туслах, дүү нарын хамт хоригджээЕрөнхий сайдын ахлах зөвлөх Л.Гансүх нарын дөрвөн хүнийг АТГ-аас энэ сарын 29-ний шөнө баривчлан, Төв аймгийн Цагдан хорих төвд саатуулсан гэх мэдээлэл найр наадам назгайрсан эдгээр өдрүүдийн онцлох дуулианы нэг болов.
УИХ-ын экс гишүүн, БОАЖ-ын сайд асан Л.Гансүх нь  Шинэчлэлийн Засгийн газраас сүүлийн хоёр жил хэрэгжүүлсэн "Нүүрс” хөтөлбөрийг өнгөрсөн жил хариуцаж ажилласан.
Харамсалтай нь ард иргэдэд хямд төсөр нүүрс олгох зорилготой уг хөтөлбөрөөс Л.Гансүх өөрийн багийнханы хамтаар 3.6 тэрбум төгрөгийг хувьдаа  завшчихсан  байж магадгүй гэх сэжим байгаа учраас ийнхүү сэжигтнээр татагдан шалгагдаж байгаа аж.

Түүний баг командынхан гэдэг нь хамаатан садан, ойрын хүрээнийхэн нь гэнэ. Тодруулбал Ерөнхий сайдын ахлах зөвлөхийг УИХ, Засгийн газрын гишүүн байх үед нь туслахаар нь ажиллаж байсан нэгэн, Л.Гансүхийн эхнэрийн төрсөн дүүгийнх нь болон өөрийнх нь төрсөн эгчийн хүүхдүүд юм байна. Тэднийг бүгдийг нь саатуулсан талаар эх сурвалж мэдээллээ.

АТГ энэхүү хэргийг Үндэсний аудитын газрын шалгалтын дүнгээс сэжиглэн шалгаж эхэлсэн гэх. Учир нь Үндэсний аудитын газраас хийсэн шалгалтаар "Нүүрс” хөтөлбөрөөс 3.6 тэрбум төгрөгийн хууль бус орлого олсныг тогтоосон аж.

 2012 оны өвөл "Нийслэлээс 100 гаруй км-ийн цаана хэдэн сая тонн нүүрс хэвтэж байна. Энэ баялгаар нийслэлийн гэр хорооллын өвлийн хэрэглээг хамгийн хямдаар хангана” гэж мэдэгдсэн Засгийн газар тус хөтөлбөрийг хэрэгжүүлж, 2012-2013 онд их хэмжээний хөрөнгө зарцуулсан билээ.
Багануурын уурхайгаас нүүрс олборлож, савлах, зөөвөрлөх, зарж борлуулах ажлыг "Эм Жи Эл Эс Би” гэх компани хариуцаж, УБТЗ, нийслэлийн дүүрэг, хороод болон иргэд хамрагдсан бол Зэвсэгт хүчний зарим анги салбарт цэргийн алба хаагчдыг үнэ хөлсгүй шахам дайчилсан билээ. Хөтөлбөр хэрэгжүүлэх үед "Нүүрсний үнэ удахгүй буурна” хэмээн мэдэгдэж байсан Ерөнхий сайдын ахлах зөвлөх ийнхүү  сэжигтэн болж, хоригдоод байна.
"Эм Жи Эл Эс Би” компани сэжигтэн Л.Гансүхийн төрсөн охин Г.Цэрэнжагзангийнх гэж байгаа.  Тус компанийн ерөнхий нягтлан бодогч нь Л.Гансүхийн төрсөн эгчийнх нь хүүхэд. Л.Гансүх "Нүүрс” хөтөлбөрийн дагуу хэрэгжүүлэх ажлыг охиныхоо компанид тендергүй авч өгсөн гэх мэдээлэл  тухайн үедээ цацагдаж байсныг санаж байгаа байх. Тэр үед Л.Гансүх "Би ямар ч буруугүй” хэмээн мэдэгдээд байсан.  
Тэгвэл Ерөнхий сайдын зөвлөхийн  идсэн уусан эсэхийг  шалгуулахаар ийнхүү  цагдан хорилоо.  

 

 

 М.Нандин Uls.mn

Санал болгох

Сэтгэгдэл

АНХААРУУЛГА: Уншигчдын бичсэн сэтгэгдэлд www.ENE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 9318-5050 утсаар хүлээн авна.
>