Онцгойгийнхон автобусны 33 зорчигчийг аварчээ
Нийслэлийн Чингэлтэй дүүргийн 5 дугаар хорооны нутаг "Гэсэр” сүмийн баруун талын авто замын зорчих хэсгийн хажуу руу 33 хүнтэй зорчиж явсан "Атибус” ХХК-ийн "Дэу” загварын зорчигч тээврийн том оврын автобус унах гээд байна гэсэн дуудлага энэ амралтын өдөр өглөөний 08:26 цагт Нийслэлийн Онцгой байдлын газар иржээ. Дуудлагын дагуу Нийслэлийн Онцгой байдлын газрын Аврах ангийн 7 албан хаагч, 2 автомашинтайгаар ажиллаж, хазайсан байсан тээврийн хэрэгслийн аюулгүй байдлыг хангаж зорчигчдыг гаргасан байна. Онцгойгийнхон ийнхүү яаралтай арга хэмжээ аваагүй байсан бол 45 градус хазайсан автобус унаж зорчигчид гэмтэх аюултай байжээ.
