Өнөөдөр “Цагаан таягтны өдөр”
Дэлхийн "Цагаан таягтны өдөр” буюу хараагүйчүүдийн эрхийг хамгаалах өдөр өнөөдөр тохиож байна. Энэ өдрийг дэлхий даяар аравдугаар сарын хоёр дахь долоо хоногийн пүрэв гаригт тэмдэглэдэг уламжлалтай.
Уг өдрийн хүрээнд өнөөдөр БСШУЯ, Монголын хараагүйчүүдийн нийгэмлэг хамтран ажиллах санамж бичиг байгуулахаар болжээ.
"Хараагүй хүмүүсийн олон улсын холбоо”-ны санаачилгаар анх 1979 онд уг өдрийг тэмдэглэсэн байна. Энэ өдөр хараагүй иргэд өөрийн үзэл бодол дуу хоолойгоо төр, засаг, олон нийтэд хүргэн, тулгамдаж байгаа асуудлаа хэлэлцэж, шийдвэрлэх арга замуудыг хайсаар иржээ.
Дэлхийн хэмжээнд 37 гаруй сая хараагүй иргэн амьдардаг байна. Харин манай оронд 15 гаруй мянган хараагүй иргэн амьдардаг аж.
Г.Тэгшсүрэн
