|
Видео

Шинэ мэдээ

“Эрдэнэт” үйлдвэрийн өргөтгөл 12 сая долларын нэмэлт бүтээгдэхүүн үйлдвэрлэжээ

"Эрдэнэт” үйлдвэр бүтээгдэхүүн үйлдвэрлэлээ нэмэгдүүлж, Баяжуулах фабрикийн Өөрөө нунтаглах хэсгийг өргөтгөн, техник технологийн шинэчлэл хийсэн. Тоног төхөөрөмжийн тохируулга жигдэрч, өнөөдрийн байдлаар цагт 800 хүртэл тонн хүдэр боловсруулж, төслийн хүчин чадлаа бүрэн эзэмшин ажиллаж байна. Өөрөө нунтаглах хэсгийн өргөтгөлийг 2015 оны 6-р сарын 20-нд хүлээн авснаас хойш өнөөг хүртэл 12 мянга 250 тонн зэсийн баяжмал буюу 12 сая долларын нэмэлт бүтээгдэхүүн үйлдвэрлэжээ. Дэлхийн зах зээлд зэсийн үнийг 4950 доллар/тонноор тооцоход он дуустал 27,9 сая долларын нэмэлт бүтээгдэхүүн үйлдвэрлэх төлөвлөгөөтэй байна. Хэрэв 2016 онд зэсийн дундаж үнэ 6200 доллар/тоннд  хүрвэл Өөрөө нунтаглах хэсгийн өргөтгөл компанид 120 орчим сая долларын ашиг оруулна. "Эрдэнэт” үйлдвэрт хийгдсэн энэ өргөтгөл нь компанийн үйлдвэрлэлийн хэвийн, тогтвортой ажиллагааг хангахаас гадна Монгол улсын эдийн засагт өндөр ач холбогдолтой, дэлхийн зах зээлд компанийн өрсөлдөх чадварыг нэмэгдүүлсэн. "Эрдэнэт” үйлдвэрийн хүдэр боловсруулалтыг жилд 6 сая тонноор нэмэгдүүлж 32 сая тоннд хүргэж буй энэхүү төсөл нь компанийн сүүлийн 26 жилийн хугацаанд хийгдэж байгаагүй, богино хугацаанд хийгдсэн томоохон бүтээн байгуулалт юм.


У.Цэрэнбат


Сэтгэгдэл

АНХААРУУЛГА: Уншигчдын бичсэн сэтгэгдэлд www.ENE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 9318-5050 утсаар хүлээн авна.