ХӨСҮТ-өөс дараах сэрэмжлүүлгийг хүргэж байна.

-Улаан эсэргэнэ гэж ямар өвчин вэ?

-Улаан эсэргэнэ нь А хүрээний стрептококкоор үүсгэгддэг, ерөнхий хордлого, гүйлсэн булчирхайн үрэвсэл, арьсан дээрх тууралтаар илэрдэг цочмог халдварт өвчин юм. Хүүхдүүд ялангуяа 10 хүртэлх насны хүүхдүүд илүү өртдөг.

-Халдварын эх уурхай хэн бэ?

-Улаан эсэргэнэ өвчтэй хүн, А хүрээний стрептококкын нян агуулагчид.

-Халдвар ямар замаар дамжих вэ?

-Халдвар амьсгалын замаар агаар дуслаар дамжина. Мөн уг өвчин үүсгэгчээр бохирлогдсон эд юмс, тоглоом, өвчтөний хувцас, хүнсний зүйл, сүүгээр дамжиж болно.

-Хэзээ хамгийн халдвартай байх вэ?

-Улаан эсэргэнэ өвчний нууц үе дунджаар 2-7 хоног ба өвчний эхний өдрөөсөө л бусдад  халдварлах аюултай.

-Ямар шинж тэмдэг илрэх вэ?

• Халуурна (38⁰-40⁰С)

• Хөөмий, залгиур, гүйлсэн булчирхайн үрэвсэл (улаймал шинжтэй юм залгихад эмзэглэлтэй хөндүүр болно)
• Тунгалагийн булчирхайн үрэвсэл (тэмтрэхэд эмзэглэлтэй хатуувтар)

• Тууралт (хоорондоо маш шигүү, тод улаан заримдаа цайвар өнгөтэй, цээжний 2 хажуу хэвлийн доод хэсэг,  цавь, суга, тохойд илүү шигүү гарсан байдаг),

• Хэл зузаан цайвар өнгөртэй болно (2-3 хоногт өнгөр нь хэлний үзүүр болон хоёр захаасаа арилна, 4-5 дахь хоногт хэл час улаан өнгөтэй болж бөөрөлзгөнөтэй төстэй харагдна),

• Бөөлжих, хэвлийгээр өвдөх, нойр хоолондоо муудах шинжүүд илэрнэ.

Хэрвээ та улаан эсэргэнэ өвчнөөр өвдсөн хүнтэй хамт байсан бол 

• 10-21 хоног эмчийн хяналтанд байх,
• Гэр орондоо чийгтэй цэвэрлэгээг тогтмол хийх, агааржуулалтыг цаг тутамд 5-15 минут хийж байх,
• Ам, хамрын хөндий, хоолойгоо тамедин, царван, сод гэх мэт цэвэршүүлэх уусмалаар өдөрт 2-3 удаа тогтмол зайлж хэвших,
• Хүнсэндээ витаминлаг хоол хүнс хэрэглэх,
• Халуун, бүлээн шингэн юм ахиухан уух,
• Дулаан хувцаслаж даарахгүй, хоолойгоо өвтгөхгүй байх,
• Өвчний шинж тэмдэг илэрсэн тохиолдолд эмчид үзүүлэхийг зөвлөж байна.