Авто худалдаачид тайван жагсаал хийлээ
Сонгинохайрхан дүүргийн 32 дугаар хороонд байрлах Авто худалдааны цогцолборын эхний ээлж ашиглалтад ороод удаагүй байна. Гэвч хотод үйл ажиллагаа явуулдаг автомашины зах, худалдаачид цогцолбор руу нүүхгүй гэдгээ хэлж, удаа дараа эсэргүүцэл илэрхийлж буй юм.
Өнөөдөр ч эсэргүүцэл илэрхийлж, автомашины худалдаа эрхлэгчид тайван жагсаал хийлээ. "Их тэнгэрийн хас” үндэсний нийгэмлэгийн зохион байгуулсан энэ жагсаалд Да хүрээ, Мөнгөн хүлэг, Дизель хүрээ гэсэн захуудын үйлдвэрчний эвлэлүүд оролцсон юм. Тэд Авто худалдааны цогцолбор руу нүүхгүй гэдгээ ийн тайван жагсаалаар илэрхийлж буй аж.
"Их тэнгэрийн хас” үндэсний нийгэмлэгийн тэргүүн О.Мөнх-Эрдэнэ "НИТХ-ын 29 дүгээр тогтоолыг эргэж хараач ээ. Хүний эрүүл мэндэд ноцтой хохирол учруулах газар руу 6000 бизнес эрхлэгчийг аваачих гэж байна. Хүмүүсийн амьдрал хэцүү энэ үед дөрвөн сая төгрөгийн үнэтэй газрыг шахаж байгаа нь буруу. Бид нүүхгүй” гэв. Тайван жагсаалд оролцогчид хотын дарга Э.Бат-Үүлд шаардлага хүргүүлжээ.
В.Бат
