Нүүрс тээвэрлэлтийн урт дараалал үүссэн шалтгаан нь хээл хахууль
Зам тээвэр, хөгжлийн яам, Автотээврийн үндэсний төвийн удирдах албан тушаалтнууд олон улсын ачаа тээврийн Ц тусгай зөвшөөрлийг танил тал, хахуулиар олон тоогоор олгосны улмаас Өмнөговь аймагт нүүрс тээвэрлэлтэд зохиомол дараалал үүсгэжээ.
Энэ хэрэгтэй холбогдуулан Автотээврийн үндэсний төвийн Тээвэр зохицуулалтын хэлтсийн дарга Д.Б-д 2017 оны наймдугаар сарын 4-ний өдөр эрүүгийн хэрэг нээсэн байна.
Яллагдагч Д.Б нь нэр бүхий компанид олон улсын ачаа тээврийн зуучийн эрх олгохын тулд албаны эрх мэдлээ ашиглан, удаа дараагийн үйлдлээр их хэмжээний хахууль авсан байж болзошгүй гэмт хэргийг илрүүлэн, прокурорын зөвшөөрөлтэйгөөр нэгжлэг хийж бэлэн мөнгө илрүүлэн эд мөрийн баримтаар хураан авсан байна.
АТГ-аас түүнийг өнгөрсөн сарын 16-ны өдөр яллагдагчаар цагдан хорьж, шалгасан байна. Харин энэ сарын 14-ний өдөр шүүхээс үргэлжлүүлэн хорих шаардлагагүй хэмээн суллажээ.
Хэргийн мөрдөн байцаалт үргэлжилж байна гэдгийг Авлигатай тэмцэх газраас мэдээллээ.
Эх сурвалж www.wikimon.mn
