Австралийн түймрийн утаа Чилид хүрчээ
Австралийн ойн түймрийн утаа Чили улсын төв болон өмнөд хэсэгт хүрч, агаар бохирдуулж эхэлжээ. Чилийн Цаг уурын алба түймрийн утаа орж ирсэн зургийг Twitter хуудсандаа тавьсан байна. Зураг дээрээс харахад түймрийн утаа бага зэргийн хүрэндүү өнгөтэй харагдана. Харин доор нь "Агаарын урсгалаар дамжин утаа Чили, Аргентинд хүрчээ” гэж бичжээ.
Австралид есдүгээр сараас хойш ойн түймэр дэгдэж байгаа юм. Нийт 5,1 сая га газрыг хамарч, 25 хүн амь эрсэджээ. Австрали улс түймэртэй тэмцэж, АНУ зэрэг гадаадын орнууд ч тусалж байгаа боловч цаг агаар халуун, ган гачигтай, салхи ихтэй байгаа тул түймэр унтрахгүй байгаа юм.
