|
Видео

Шинэ мэдээ

Донор зохион байгуулагч сайн дурын идэвхтнүүдийг бэлтгэлээ

Донор зохион байгуулагч сайн дурын идэвхтнүүдийг бэлтгэлээ

 

Цус сэлбэлт судлалын үндэсний төвөөс санаачлан ЦССҮТ-д "Донор зохион байгуулалтад сайн дурын идэвхтнүүдийн оролцоог нэмэгдүүлье” сэдэвт сургалтыг зохион байгуулсан байна.

Энэхүү сургалт нь төрийн болон төрийн бус байгууллагуудын хамтын ажиллагааг дэмжих, донор зохион байгуулалтад сайн дурын идэвхтнүүдийн оролцоог нэмэгдүүлэн, тусламж үйлчилгээний чанар хүртээмжийг дээшлүүлэх зорилготой юм.

Тус сургалтад Монголын донорын холбооны 20 гаруй гишүүн, сайн дурын донор элсүүлэгч нар оролцон цус цуглуулах үед донорт үзүүлж буй харилцаа, хандлага, донорыг угтан үйлчлэх, талархал илэрхийлэх, угтуулсан сургалт зохион байгуулах зэрэг асуудлаар ЦССҮТ-ийн Донор зохион байгуулалтын тасгийн эмч, мэргэжилтнүүдээс аргазүйн зөвлөгөө авч, санал солилцлоо.

Сургалтыг нээж ЦССҮТ-ийн ерөнхий захирал АУ-ны доктор, дэд профессор Н.Эрдэнэбаяр үг хэлж, нийт оролцогчдод амжилт хүсэн, ДЭМБ, ОУУЗУХСНХ-ны баримталж буй бодлого, стратегийг танилцуулан, донор-үйлчлүүлэгчтэй харилцах харилцааны тулгуур зарчим, донорт зөвлөгөө өгөх арга зүй зэрэг сэдвээр лекц уншлаа. Мөн ДЗБТ-ийн эмч, мэргэжилтнүүд "Донор сонгох шалгуур үзүүлэлт”, "Суурин болон явуулын хэлбэрээр цус цуглуулах үйл ажиллагааг төлөвлөх, зохион байгуулах”, "Донор элсүүлэх донорыг идэвхжүүлэх ажиллагаа” зэрэг сэдвээр тус тус лекц уншиж, мэдээлэл хүргэв.

Бэлтгэгдсэн сайн дурын идэвхтнүүд ЦССҮТ-ийн үйл ажиллагаанд дэмжлэг үзүүлэн ажиллах ба дээрх сургалтыг жил бүр уламжлал болгон зохион байгуулахаар тогтоод байна.

Эх сурвалж: Эрүүл мэндийн яам

Сэтгэгдэл

АНХААРУУЛГА: Уншигчдын бичсэн сэтгэгдэлд www.ENE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 9318-5050 утсаар хүлээн авна.