Энэ зуур олон жил цааснаас цаас дамжин яригдсан тавдугаар цахилгаан станцын төслийг үргэлжлүүлэх шаардлагагүй гэх шийдвэрийг салбарын яам гаргасан байх юм.  Олон он дамжин яригдсан Улаанбаатар хотын зүүн бүсийг цахилгаан дулаанаар хангах зорилготой "ДЦС V” төслийг үргэлжлүүлэх эсэх асуудлыг Эрчим хүчний яамны сайдын зөвлөл хэлэлцэж шаардлагагүй хэмээн үзжээ.Тус станцыг ашиглалтад оруулахад ус, нүүрс, төмөр замын асуудлыг шийдэхэд хүндрэлтэй хэмээн албаныхан хэлсэн байна. Ийнхүү тавдугаар цахилгаан станц том төслүүдийг хөдөлгөх мөрөөдлийн жагсаалтаас мөн л хасагдав.

Хамгийн сүүлд АН-ын Засгийн газрын үед тавдугаар цахилгаан станцыг барих асуудал хэлэлцэгдэж  "Ургах наран” хорооллын урд барих шийдвэр гарсан. Гэтэл V цахилгаан станцыг барихаар төлөвлөсөн газар бол ундны усны тэжээлийн дотоод мужийн хамгаалалтын бүсэд багтахын зэрэгцээ улсын дархан цаазат Богд хан уулын ойролцоо оршдог . Тийм учраас дахин судалгаа хийх хэрэгтэй болсон тухай албаныхан дуулгаж байв.

Нийслэлд дэх хүн амын нягтаршил өдөр ирэх тусам өсөн нэмэгдэж байна. Гэр хорооллын айлуудын халаалтыг цахилгаанаар шийдэх асуудалд эрх баригчид бараг л санал нэгдээд байна. Үүнтэй зэрэгцэн цахилгаан станцууд ачааллаа дийлэхээ больж, оны эхээр хүний амь хүртэл эрстээд байна. Энэ бол хуучирсан, шаардлага хангахаа больсон цахилгаан станцууд "чөлөө гуйж” эхэлсний шинж. Нэг үгээр Улаанбаатар цахилгаан дулааны ачаалал огцом нэмэгдэж байгаа энэ үед тавдугаар цахилгаан станцын төслийг зогсоох нь хэр зохимжтой вэ? 

Хэрэв ирэх оноос шинээр баригдсан барилгуудыг ашиглалтад оруулж, нүүрс түлж байгаа дэд станцуудыг зогсоох юм бол цахилгаан станцуудын ачаалал улам л нэмэгдэнэ. Яндан цөөлж ард иргэдээ орон сууцны хороололд амьдруулах сайхан л мөрөөдөл. Гэвч эхлээд цахилгаан станцуудын хүчин чадлын нэмэгдүүлэх асуудалд эхлээд анхаарвал ямар вэ?  

П.ГОО

Оллоо.мн