Сургуулийн орчинд ухаалаг утас хэрэглэхийг хориглох тушаалын хэрэгжилт ямар байна вэ
Сургалтын орчинд авах арга хэмжээний тухай Засгийн газрын тогтоол гарч Ерөнхий боловсролын сургууль, цэцэрлэгийн сургалтын орчинд ухаалаг гар утас ашиглахыг энэ сарын 1-нээс хязгаарласан. Энэ нь хүүхдүүдийг цахим халдлага, донтолт, гадуурхлаас сэргийлэх, эрүүл мэнд, амь насыг хамгаалах, аюулгүй байдлыг хангах, сурах идэвхийг нэмэгдүүлэх, хүүхдүүдийн чөлөөт цагийг үр ашигтай өнгөрүүлэх, нийгмийн бодит харилцаанд оролцох боломжийг нэмэгдүүлэх зорилготой авч буй арга хэмжээ юм. Тэр ч утгаараа энэ шийдвэрийг маш олон хүн дэмжиж, сайшаалтай хүлээж авсан. Гэтэл яг амьдрал дээр энэ тогтоолын хэрэгжилт хангалтгүй байгаа нь захын нэг сургуулиар ороход нүдэнд илхэн харагдаж байна.
Харин зарим нь "хичээлийн цагаар гар утас хэрэглэхийг багш хориглодог. Заавал хайрцаг саванд хийж, хурааж авдаггүй. Харин заавал унтраах, эсвэл дууг нь хаагаад далд хий гэдэг" гэсэн юм.
Тодруулбал, Сургуулийн орчинд ухаалаг гар утас ашиглахыг хязгаарлах тогтоомж хэрэгжиж эхэлсэн ч сургуулийн орчин юм уу, эсвэл зөвхөн сургалтын орчин буюу хичээлийн үеэр утас ашиглахгүй байх юм уу гэдэг нь тодорхой бус байгаа юм байна.
Үүнтэй холбогдуулан, зарим багш хичээл дээр утас авчрахыг хориглосон байдаг бол зарим нь хичээл эхлэхээс өмнө бүгд утсаа унтраан цүнхэндээ хийхийг шаарддаг аж.
Харин багш нар нь "аравдугаар сарын 1-нээс эхлэн эцэг, эх, багш, сурагчийн гурвалсан гэрээ байгуулж эхэлсэн. Дагалдах журам нь батлагдахаар дотоод журмандаа өөрчлөлт оруулна" гэв.
Тиймээс холбогдох яам нь энэ асуудлыг яаралтай нэг тийш нь болгож, дагалдах журмыг нь батлахгүй бол нэр төдий хэрэгждэггүй хууль, тогтоомжийн тоог нэгээр нэмэхэд хүрэх нь.
Мөн эцэг эхчүүд маань энэ тал дээр онцгой анхаарч, хүүхдүүдийнхээ төлөө ухаалаг утсыг нь товчтой утсаар сольж, зөвхөн сургуулийн орчинд гэлтгүй гэр орондоо ч гэсэн ухаалаг утаснаас ангид байлгаж, цахим орчныг дагасан олон эрсдэлээс урьдчилан сэргийлэх нөхцөл боломжоор нь хангаж өгөхийг уриалж байна.
