Сөүлд өндөр настай хүмүүс халдвар авах тохиолдол нэмэгдэж байна
Үүнтэй холбоотойгоор хүнд өвчтөнүүдийн тоо нэмэгдэж болзошгүй нөхцөл байдал үүсжээ. БНСУ-д “COVID-19” халдвар голомтлон тархаж, сүмүүдтэй холбоотой халдварын тохиолдлын тоо нэмэгдэж буй энэ үед мягмар гарагт халдварын 320 шинэ тохиолдол илэрчээ. Ингэснээр орон даяар халдвар авсан хүний нийт тоо 18265-д хүрсэн байна.
БНСУ-д өнөөдрийн байдлаар халдвар авсан хүнд өвчтөний тоо 43 болж нэмэгдсэн бөгөөд энэ сарын 18-нд уг тоон үзүүлэлт ес байжээ. Хүнд өвчтөнүүдийн тоо цаашид энэ байдлаар нэмэгдсээр байвал ирэх долоо хоног гэхэд 130-д хүрэх төлөвтэй байна хэмээн мэргэжилтнүүд тооцоолжээ.
БНСУ-д энэ сарын 14-нөөс халдварын шинэ тохиолдлын тоо өдөрт гурван оронтой тоогоор нэмэгдэх болсон бөгөөд сүүлийн 13 хоногт орон даяар 3395 хүн халдвар авчээ. Тэдгээрийн дийлэнх нь Сөүлийн хойд хэсэгт орших сүмд очсон хүмүүстэй ойр байсан юм уу энэ сарын 15-нд болсон Засгийн газрын эсрэг жагсаалд оролцсон хүмүүс байжээ.
Э.Хулан
Эх сурвалж: Монцамэ агентлаг
