Үлгэр дууссан ч өөрийг олсон
Олон нийт Хөгжлийн банкны зээлдэгчдийн асуудлыг шалгаж, хянахдаа эздээр нь өөрсдөөр нь төлөлтийг нь хийлгээсэй гэж хүсч, анхаарал тавин хүлээж байна.
Хөгжлийн банк гэх нэртэй ч эргээд харахад 841 тэрбум төгрөгөөр эрх мэдэл, мэдээлэлд ойр 26 хүн, аж ахуйн нэгжийн л халаасны мөнгийг зузаатгажээ.
Тиймээс л өнөөг хүртэл олон нийтээс нууцалж байгаад дийлэхээ болиод ирмэгц зарлан, тунхаглаж, жигшээж буй бололтой.
Төр, засаг, олон нийт Хөгжлийн банкны зээлийг ам уралдан ярьж байх зуурт УИХ-ын даргын захирамжаар Ажлын хэсэг байгуулж, тэднээр өнөөх "хулгайч нараа” сүр дуулиантайгаар зарлуулахаар болов.
Гэвч Ажлын хэсгийнхэн дунд УИХ-ын гишүүн Б.Бат-Эрдэнэ, Ц.Даваасүрэн нар байсан нь Хөгжлийн банкны хулгайтай тэмцэх асуудал ёстой л "Дашийн шог” болох нь гэдэг ойлголтыг төрүүлж эхэллээ.
Учир нь мань гишүүдийн хувьд өмнө нь Оюутолгой болон уул уурхайн асуудлуудад хатуу байр суурьтай байна хэмээн эсэргүүцлээ илэрхийлж байсан ч үнэндээ өөрсдийн хувийн пи-араа хийснээс улс, эх орондоо хэрэгтэй шийдэлд хүрч байгаагүй гэдгийг олон нийт мэддэг болсон. Тиймдээ ч Оюутолгойн асуудал нэг талдаа гарснаас хойш мань Б.Бат-Эрдэнэ, Ц.Даваасүрэн гишүүд дахиад олон жил "мэрчих” сэдэв үгүй болоод байсан биз.
Гэтэл тэдний аз дайрч, бидний эз болж Хөгжлийн банкны хулгай, луйвар илчлэгдэж эхэлсэн нь тэдэнд гайгүй сайн пи-ар хийчих сэдэв болж гарч ирлээ.
Уг нь нэгэнт Хөгжлийн банкны хулгай, луйврыг хуулийн дагуу дорвитойхон шалгаж, нягтлах гэсэн юм бол эрх баригчид энэ мэт гишүүдээ Ажлын хэсэгтээ оруулахгүй л байх байлаа.
