Туршилтыг туршив
БНСУ-ын одоогийн Ерөнхийлөгч Пак Гын
Хэгийн нэр хүндийг ард олны дунд өргөсөн зүйлийн нэг нь нийтийн
тээвэртээ хийсэн түүний шинэчлэл байсан гэдэг. 12 жилийн өмнө Сөүл хотын
нийтийн тээврийн салбар яг л манай улсынхтай адил эмх замбараагүй,
автобуснууд нь зорчигчдоо булаацалдан хоорондоо уралддаг, компаниуд нь
орлогоо хөөгөөд үйлчилгээндээ анхаардаггүй байжээ. Пак Гын Хэ тэр үед
хотын даргаар сонгогдоод хоёрхон жилийн дотор нийтийн тээврийн салбарын
асуудлыг шийдэж чадсан байна. Яаж шийдсэн бэ гэвэл нийтийн тээврийн
сүлжээг шинээр төлөвлөн, автобусуудыг богино зайд хурдан явдаг болгож,
GPS суурилуулснаас гадна бүх компанийг тэрхүү нэгдсэн сүлжээндээ
хамруулжээ Ийм замаар өнөөгийн Улаанбаатар хотын нийтийн тээврийн
сүлжээг хөгжүүлэхээр нийслэлийн удирдлагууд, нийтийн тээврийн
салбарынхан гар гараа барилцаад байна. Солонгосчууд чадсан байхад бид
яагаад чадахгүй гэж. Бусдаас сайн үлгэр дуурайл, амжилттай туршлагыг нь
авч хэрэгжүүлбэл Монгол Улс хурдан хөгжинө шүү дээ. Хүн тээвэрлэсэн
хэрнээ мах ачиж яваа мэт давхидаг, хоорондоо уралдаж осол гаргадаг,
зорчигчоо бэртээж гэмтээдэг, замын хөдөлгөөний дүрэм зөрчдөг гээд
нийтийн тээврийн салбарынхны талаар иргэд ам муутай. Энэ бүх шүүмжлэлийг
нийтийн тээврийн салбарынхан хүлээн авч, алдаа дутагдлаа засахаар
туршилт хийж эхэллээ. Эл туршилтыг иргэд хэрхэн хүлээн авч буйг
туршихаар өчигдөр өглөө ажилдаа автобусаар ирэв.
