"Нийслэлийн Иргэний танхим" энэ сарын 10-наас хаалгаа нээнэ
"Нийслэлийн "Иргэний танхим” энэ сарын 10 -наас иргэдийнхээ санал хүсэлтийг сонсоно. Нийслэлийн Иргэдийн төлөөлөгчдийн хурлаас иргэдийнхээ санал бодлыг сонсох нээлттэй хэлэлцүүлгийг тогтмол зохион байгуулах шийдвэрийг гаргалаа. Нээлттэй хэлэлцүүлгийн анхны сэдэв нь "Нийслэлийн нийгэм - эдийн засгийн зорилт” байх юм.
Нийслэлийн Засаг даргын 2016 - 2020 онд хэрэгжүүлэх мөрийн хөтөлбөр, "Нийслэлийн нийгэм - Эдийн засгийн зорилт” бодлогын бичиг баримтанд иргэдийн саналыг тусгах зорилгоор анхны хэлэлцүүлгийн сэдвээр сонгосон байна. Нээлттэй хэлэлцүүлэгт Нийслэлийн Иргэдийн төлөөлөгчдийн хурлын дарга Ц. Сандуй оролцож, иргэдтэйгээ уулзаж, салбарын мэргэжилтнүүдийн судалгааг сонсоно.
Хэлэлцүүлэгт ирж амжихгүй иргэд А4-ийн нэг хуудас цаасанд санал бодлоо тусгаж, нийслэлийн "Иргэний танхим”- ын ажлын албанд илгээх боломжтой. Мөн 7010-0202 дугаарын утсаар холбогдож, саналаа хэлэх буюу "Нээлттэй хэлэлцүүлэг”-тэй холбоотой мэдээ, мэдээлэл авч болох аж.
Нийслэлийн Иргэдийн төлөөлөгчдийн хурлаас зохион байгуулж байгаа эхний хэлэлцүүлэг наймдугаар сарын 10 -ны 18 цагт Нийслэлийн " Иргэний танхим” буюу Сүхбаатар дүүргийн 8 -р хороонд байрлах Нийслэлийн засаг захиргаан 5-р байранд болно.
