Нийслэлийн Засаг даргын мөрийн хөтөлбөр, нийслэлийн Эдийн засаг нийгмийг хөгжүүлэх үндсэн чиглэлийн хүрээнд Улаанбаатар хотын Захирагчийн ажлын албанаас эмнэлгийн байгууллагуудын гадна зам талбайг иж бүрэн тохижуулах ажлыг 2016 оноос эхлүүлээд байгаа билээ.

Дээрх ажлын хүрээндНЗД бөгөөд Улаанбаатар хотын Захирагч С.Батболдоор ахлуулсан ажлын хэсэг өнгөрсөн амралтын өдрүүдэд ЭХЭМҮТ болон ХӨСҮТ-ийн гадна зам талбайн тохижилтын ажлын явцтай танилцсан. ХӨСҮТ-ийн гадна 82 мянган ам метр талбайг нисдэг тэрэг буух талбайтай, авто зогсоол, ногоон байгууламж, явган хүний зам, гэрэлтүүлэгтэй иж бүрэн тохижуулахаар Улаанбаатар зам засвар, арчлалтын газрынхан өнгөрсөн зургадугаар сарын 7-нд ажлаа эхлүүлж, өнөөдрийн байдлаар ажлын явц 70 хувийн гүйцэтгэлтэй байна. Явган зам, асфалтан хучилт нийт 8900 ам метр талбайд хийгдэхээс 500-д хийгдээд байна. Борооны ус зайлуулах шугам, хоолой анх зурганд тусгагдаагүй байснаас ажил удааширсан. Шинээр борооны ус зайлуулах шугам, хоолойн зургаа гаргаад ажлаа эхлүүлээд явж байна. Ирэх лхагва гарагт бүх талбайг асфальтаар хучиж дуусгах талаар УБЗЗАГ-ын Ерөнхий инженер Б.Баатархүү ярилаа.

Тодруулга:Нийслэл хот дахь эмнэлгийн байгууллагуудын гадна зам талбайг иж бүрэн тохижуулах ажлын хүрээнд 2016 онд Шастины нэрэмжит Улсын 3 дугаар эмнэлэг, 2017 онд ГССҮТ, СХД-ийн эрүүл мэндийн нэгдэл, Хавдар судлалын үндэсний төвийн гадна зам талбайг иж бүрэн тохижуулан ашиглалтад хүлээлгэн өгсөн бол энэ онд нийслэлийн Өргөө амаржих газар, Баянзүрх дүүргийн нэгдсэн эмнэлэг, Амгалан амаржих газар, ХУД-ийн 1-р амбулаторийн гадна зам талбайн тохижилтын ажлыг иж бүрэн хийгээд байгаа юм.