Монгол бөхийн өргөөнөө XVII жарны Тийн унжлагат хэмээх шороон нохой жилийн сар шинийн баярт зориулсан бөхийн барилдаанд улс, аймгийн алдар цолтой 256 бөх хүчийг сорин, уран мэхээ уралдуулан барилдлаа.

Сар шинийн 56 дахь удаагийн барилдаанд Ховд аймгийн Зэрэг сумын харьяат Монгол Улсын харцага Б.Бат- Өлзий түрүүлж, Увс аймгийн Давст сумын уугуул Улсын арслан П.Бүрэнтөгс үзүүрлэлээ.

Сар шинийн барилдааны зургаагийн даваанд Улсын аварга Ч.Санжаадамба, Улсын заан Б.Батмөнхийг давсан бол Улсын арслан П.Бүрэнтөгс, Дорноговь аймгийн Эрдэнэ сумын уугуул А.Цацабшираар зургаа давлаа. Харин Улсын арслан Ц.Содномдорж, Улсын заан Н.Түвшинбаярыг давж шөвгийн дөрөвт үлдлээ. Улсын харцага Т.Баасанхүү, Б.Бат-Өлзий нар тунан барилдаж Б.Бат-Өлзий давж, шөвгийн дөрөвт шалгарлаа. 

Шөвгийн дөрөвт Ч.Санжаадамба аварга, арслан П.Бүрэнтөгсийг амалж, арслан Ц.Содномдорж, харцага Б.Бат-Өлзий нар тунан барилдаж Б.Бат-Өлзий үзүүр түрүүнд үлдсэн бол Улсын аварга Ч.Санжаадамбыг арслан П.Бүрэнтөгс давснаар түрүү бөхийн төлөө харцагатай барилдахаар болсон юм.

XVII жарны Тийн унжлагат хэмээх шороон нохой жилийн сар шинийн баярт зориулсан бөхийн барилдааны үеэр Тахиа жилийн шилдэг бөхчүүдэд шагнал гардуулсан юм.

Тухайлбал, Эрдэнэт хивс үйлдвэрийн нэрэмжит "Ёс жудагтай бөх” шагналыг Өвөрхангай аймгийн Баянгол сумын уугуул Улсын заан Б.Сайнбаяр, Мөн "Уран барилдаанч бөх"-ийн анхны шагналыг харцага Т.Баасанхүү, Тахиа жилийн МҮБХ-ны  хамгийн өндөр чансаа /28164/-ны нэг сая төгрөгийн шагналыг Улсын харцага Б.Бат-Өлзий тус тус хүртлээ.