УИХ дахь МАН-ын бүлгийн өнөөдрийн хуралдаанаар хэлэлцсэн асуудлаар тус бүлгийн дарга Д.Хаянхярваа мэдээлэл хийлээ. МАН-ын бүлэг хуралдаанаараа 2019 оны төсвийн төсөл болон хүүхдийн мөнгөн тэтгэмжийг 100 хувь олгох тухай асуудлыг хэлэлцэхээр товлоод байжээ. Гэтэл Сангийн сайд Ч.Хүрэлбаатар, Монгол банкны Ерөнхийлөгч Н.Баяртсайхан нар гадаадад томилолттой яваа тул ганцхан хүүхдийн мөнгөний асуудлыг хэлэлцсэн байна. 

ХҮСЭЛТ ГАРГАСАН ХҮН БҮРТ ХҮҮХДИЙН МӨНГӨН ТЭТГЭМЖ ОЛГОНО 

Энэ талаар тус бүлгийн дарга Д.Хаянхярваа "Манай бүлгийн хуралдаанаар Хүүхдийн мөнгөн тэтгэмжийг 100 хувь олгох тухай С.Бямбацогт нарын гишүүний санаачилсан төслийг хэлэлцлээ. Дээрх тогтоолын төсөлд хүүхдийн мөнгөн тэтгэмж авах хүсэлт гаргасан өрх бүрт 20 мянган төгрөг олгохоор тусгасан. Засгийн газар, ОУВС-гийн хамтран хэрэгжүүлж буй хөтөлбөр, одоогийн хууль, тогтоомжийн хүрээнд Монгол Улсын нийт хүүхдийн 80 хувь буюу 900 мянга гаруй хүүхдэд мөнгөн тэтгэмж олгох зохицуулалттай. Гэвч нийт хүүхдийн 60 орчим хувь нь мөнгөн тэтгэмж авч байгаа бөгөөд үлдсэн хэсэг нь хүсэлтээ өгөөгүй байгаа юм. Өнөөдрийн бүлгийн хурлаар энэхүү тогтоолын төслийг Төсвийн байнгын хороонд хүргүүлээд, хэлэлцээд явах нь зөв гэсэн шийдвэр гаргалаа” хэмээв.

Мэдээллийнхээ дараа тэрбээр сэтгүүлчдийн сонирхсон асуултад хариулав.

-Хүүхдийн мөнгөн тэтгэмжийг 100 хувь олгоход хэдэн төгрөг шаардлагатай вэ?

-100 хувь олгоход 27 тэрбум төгрөг шаардлагатай. Энэ мөнгийг олох бололцоо байна. Гэхдээ ОУВС-тай тохиролцсон тохиролцооны хүрээнд байх ёстой гэж үзэж байна.

-Ирэх оны төсөв ихээхэн шүүмжлэл дагуулж байгаа. Энэ талаар МАН-ын бүлэг ямар байр суурьтай байна вэ?

-Ирэх оны төсвийг манай бүлэг хэд, хэдэн удаа хэлэлцсэн. Ирэх оны төсөв 9 их наядын орлоготой, 11 их наядын зарлагатай байхаар төлөвлөсөн. Жил жилийн төсөв батлахад хэл ам, маргаан дагуулдаг. 2019 оны төсвийн төсөл дараагийн сонгуулийн бэлтэлтэй холбоотой гэсэн шүүмжлэл ч байна. Манай бүлэг үүнтэй санал нийлэхгүй. Ирэх оны төсөвт УИХ-ын гишүүдэд тус бүр 5 тэрбум төгрөг олгохоор тусгасан гэсэн яриа гарсан. Энэ бол тухайн гишүүний сонгогдсон тойрогт сургууль, цэцэрлэг барих мөнгө. Төсвийн төсөлд тусгасан хөрөнгө оруулалттай холбоотой зүйлсийг чамбайруулах ажлын хэсэг ажиллаж байгаа. 

-Сангийн сайд өөрийн тойрогтоо 52.8 тэрбум төгрөгийг төсөвлөсөн гэсэн яриа гарсан. Энэ талаар?

 -Энэ бол МАН-ын мөрийн хөтөлбөрт тусгасан бүс нутгийн чанартай бүтээн байгуулалтын төсөв бий. Үүнийг хуулийн дагуу байгаа эсэхийг төсвийн төслийг хэлэлцүүлэгт бэлтгэх ажлын хэсгийнхэн нягталж үзээд бүлэгт танилцуулна.

-Ирэх онд цалин, тэтгэвэр тэтгэмжийг хэдэн сард нэмэхээр төлөвлөж байна вэ?

-Цалин, тэтгэвэр, тэтгэмжийн нэмэгдэлд 700 тэрбум гаруй төгрөгийн санхүүжилт тусгасан. Хэлэлцүүлгийн явцад хугацаа тодорхой болох байх.

-Агаарын бохирдлыг бууруулах зорилгоор 54 тэрбум төгрөгөөр шүүлтүүр авах асуудал ярьж эхэлсэн?

-54 тэрбум төгрөгөөр шүүлтүүр авч байгаатай би ч хувь гишүүний хувьд санал нийлэхгүй. Үүнийг дахин нягтлах ёстой. Бид нухацтай ярилцана.