Завханд 15 настай хүү аавтайгаа маргалдаж, өөрийгөө буудсан бол Ховдод 15 настай хүү сум алдаж, аавыгаа хөнөөжээ
ЗАВХАН АЙМГИЙН УЛИАСТАЙ СУМАНД 15 НАСТАЙ ХҮҮ ААВТАЙГАА МАРГАЛДАЖ, ӨӨРИЙНХӨӨ ДУХАНД БУУДЖЭЭ
Уржигдар шөнө Завхан аймагт хүний амь эрсджээ. Тодруулбал, тус аймгийн Улиастай сумын Жаргалант багт оршин суух иргэнээс "Манай 15 настай хүүхэд өөрийгөө буудчихлаа” гэсэн дуудлага цагдаагийн байгууллагад ирсэн байна. Уг дуудлага өчигдөр буюу арваннэгдүгээр сарын 10-ны 00:15 цагт цагдаагийн байгууллагад иржээ. Улиастай сумын цагдаагийн албан хаагчид хэргийн газарт очиход 15 настай, эрэгтэй Н нь өөрийнхөө духан тус газарт буудаж, эмнэлгийн тусламж авч чадалгүй нас барсан байжээ. Хэргийн газраас ТОЗ-8 маркийн галт зэвсгийг хураан авч, Завхан аймгийн цагдаагийн газарт уг хэргийг үргэлжлүүлэн шалгаж байна.
Талийгаач хүүгийн цогцост өчигдөр шүүх шинжилгээний шинжээчид задлан шинжилгээ хийжээ. Урьдчилсан байдлаар тархины гавал яс нь задарсны улмаас амьсгал хураасан гэж гарсан аж. Одоогийн байдлаар цагдаагийн байгууллагаас хүүгийн ааваас мэдүүлэг, байцаалт авч байгаа гэнэ. Учир нь, хүнийг үхэлд хүргэсэн байж болзошгүй гэж үзэж байгаа гэнэ.
Уг хэргийн талаар эх сурвалжаас тодруулахад "15 настай хүү аавтайгаа маргалдсан юм билээ. Гэр бүлийн харилцаанаас үүдэлтэйгээр аав нь хүүдээ шаардлага тавьсан гэсэн. Гэтэл аавынхаа анд ашигладаг бууг авч гараад духандаа буудчихсан юм билээ. Гэрт нь хайрцаг сум байсан гэсэн. Талийгаач айлын том хүү бөгөөд есдүгээр ангийн сурагч. Талийгаач хүүгийн ааваас мэдүүлэг, байцаалт авч байгаа гэсэн. Мөн бууны зөвшөөрөл, худалдан авсан бичгийг шалгаж байгаа. Хэрэв тухайн хүн нь зөвшөөрөлгүйгээр галт зэвсэг ашигласан, хадгалсан бол асуудал үүсэх байх” гэлээ.
Харин бид талийгаач хүү Н-ийн ар гэрийнхэнтэй холбогдох гэсэн боловч буяны ажилтай байгаа тул мэдээлэл өгөхөөс татгалзлаа. Иймд иргэд та бүхнийг галт зэвсэг ашиглах, хадгалахдаа аюулгүй байдлаа сайтар хадгалж, хүний амь эрсдэх, эрүүл мэнд хохирохоос урьдчилан сэргийлэхийг анхааруулж байна.
ХОВД АЙМГИЙН ХОВД СУМАНД 15 НАСТАЙ ХҮҮ СУМ АЛДАЖ, НОХОЙГОО БУУДАХ ГЭЖ БАЙСАН ААВЫГАА БУУДЖЭЭ
Санамсар болгоомжгүй үйлдлээс болж 15 настай хүү аавыгаа буудаж, хөнөөсөн харамсалтай хэрэг гарчээ. Тодруулбал, цагдаагийн байгууллагад 2022 оны арваннэгдүгээр сарын 4-ний 19:20 цагт Ховд аймгийн Ховд сумын нутаг дэвгэрт "Хүн нас барсан байна” гэх дуудлага бүртгэгджээ.
Дуудлагын дагуу Ховд аймгийн цагдаагийн газраас шалгахад 43 настай, эрэгтэй О нь нохойгоо буудах зорилгоор гэрээсээ "Тоз-8” маркийн галт зэвсэг авч гарчээ. Түүнийг нохойгоо буудах гэхэд төрсөн хүү болох 15 настай, эрэгтэй Т нь "Нохойгоо буудаад хэрэггүй” хэмээн аавынхаа барьж байсан галт зэвсгээс барьж авчээ. Энэ үедээ хүү санамсаргүй байдлаар галт зэвсгийн гохон дээр дарж, аавынх нь цээжин тус газарт сум оногдож, 43 настай иргэн О амиа алджээ. Уг хэргийг Ховд аймгийн цагдаагийн газраас мөрдөн шалгах ажиллагаа явуулж байна.
Иймд галт зэвсэг болон түүнтэй адилтгах хэрэгсэл эзэмшдэг, харьцаж байгаа иргэд та бүхэн галт зэвсгийн аюулгүй ажиллагааг сайтар мөрдөж, аливаа эрсдэлээс урьдчилан сэргийлэхийг цагдаагийн байгууллагаас анхааруулж байна.
https://ergelt.mn/news/59/single/27140
