ЕБС, цэцэрлэгийн удирдлагуудад цацрагийн аюулгүй байдлыг хангуулахтай холбоотойгоор албан тоот хүргүүлжээ
Үйл ажиллагаа эрхлэх тусгай зөвшөөрөлгүй, цацрагийн хамгаалалт, аюулгүй байдлын шаардлага хангаагүй байгууллага, аж ахуйн нэгж нь сургуулийн орчинд сурагчдыг урьдчилан сэргийлэх зорилгоор рентген оношилгоонд хамруулах зөрчил гарч байгаатай холбогдуулан Мэргэжлийн хяналтын байгууллагаас нийслэлийн ЕБС, цэцэрлэгийн удирдлагуудад хууль тогтоомжийг мөрдөж ажиллах тухай албан тоот хүргүүллээ.
Бага насны хүүхдийг тодорхой нөхцөлд эмчийн заалтаар, эцэг эхийн зөвшөөрөлтэйгөөр рентген оношилгоонд хамруулах ёстой. Мөн урьдчилан сэргийлэх зорилгоор цацрагийн оношилгоонд хүн амыг хамруулахад эрүүл мэндийн асуудал эрхэлсэн хяналт, зохицуулалтын байгууллага болон цацрагийн мэргэжлийн байгууллагатай хамтран гүйцэтгэх зохицуулалттай байдаг.
Иймд Цөмийн энергийн тухай хуулийг мөрдөх, цацрагийн болзошгүй ослоос урьдчилан сэргийлж сургууль, цэцэрлэгтээ зохион байгуулахгүй байхыг анхааруулсан байна.
