"Будапешт-2018” бөхийн төрлүүдийн ДАШТ өчигдөр/10.21/ хоёр дахь өдрөө үргэлжиллээ.
Тэмцээний хоёр дахь өдөр ОУХМ Түмэнбилэгийн Түвшинтулга эрэгтэйчүүдийн 61 кг-ын жинд хүрэл медалийн эзэн болов. Ингэснээр тэрбээр Монголын чөлөөт бөхийн тамирчдаас ДАШТ-ийн 31 дэх хүрэл медалийг эх орондоо авчирлаа.
Т.Түвшинтулга Унгарын нийслэлд 1/16 шигшээд залуучуудын Азийн аварга Кыргызстаны Улукбек Жолдошбековыг 8:6-гаар ялсан ч 1/8 шигшээд "Парис-2017” ДАШТ-ий мөнгөн медальт, Европын хошой аварга ОХУ-ын Гажимурад Рашидовтой тун тэнцүүхэн барилдаж 1:2-оор ялагдсан. Оросын бөх шигшээд шалгарснаар түүнд дагах барилдаан гарсан бөгөөд Энэтхэгийн Сонба Гонганег 7:0-ээр, хүрэл медалийн төлөөх барилдаанд хоёр жилийн өмнө Лос-Анжелесийн Дэлхийн цомд ялж байсан "Будапешт-2016” ДАШТ-ий дэд аварга Гүржийн Бека Ломтадзег 6:3-аар дахин ялж, дэлхийн данстай бөх гэдгээ харууллаа.