Ц.Даваасүрэн: Ч.Сайханбилэгийн Засгийн газар Оюутолгойн хөрөнгө оруулалтын гэрээний заалтыг түдгэлзүүлснээс гэрээ хэрэгжээгүй

116

Ц.Даваасүрэн: Ч.Сайханбилэгийн Засгийн газар Оюутолгойн хөрөнгө оруулалтын гэрээний заалтыг түдгэлзүүлснээс гэрээ хэрэгжээгүй

 

Оюутолгой уурхайн үйлдвэрлэлийг дотоодын эрчим хүчээр хангах Засгийн газраас авч хэрэгжүүлж буй бодлогын талаар Эрчим хүчний сайд Ц.Даваасүрэн нар өнөөдөр хэвлэлийн бага хурал хийлээ.

Эрчим хүчний сайд Ц.Даваасүрэн "Оюу толгойн цахилгаан станц барих гэрээг цуцаллаа гэсэн ор үндэслэлгүй мэдээлэл яваад байгааг залруулах гэж энэ хэвлэлийн бага хурлыг хийж байна. Гэрээний асуудал яригдаад байгааг ташаа ойлгосон байна.

Оюу толгойн хөрөнгө оруулалтын гэрээний 7.3-т Хөрөнгө оруулагч нь үйлдвэрлэлийн үйл ажиллагаа эхэлсэн өдрөөс хойш 4 жилийн дотор Оюу толгойн эрчим хүчний нийт хэрэгцээгээ дор дурдсан буюу түүнээс дээш эрчим хүчээр хангана.

Нэгд, Оюу толгой станц барьсан бол, хоёрдугаарт, гуравдагч этгээдийн барьсан цахилгаан станц, гуравдугаарт Монгол Улсын цахилгаан станцын эх үүсвэрээс. 2017 оны 7 дугаар сараас Монгол Улсаас Оюу толгой цахилгаанаа авах ёстой байсан ч аваагүй.

Яагаад гэвэл Ч.Сайханбилэгийн Засгийн газрын үед хууль зөрчин  "Өмнөд бүсийн эрчим хүчний салбарт хамтран ажиллах гэрээ" гэгчийг байгуулсан. Энэ гэрээнээс болоод хөрөнгө оруулалтын гэрээ хэрэгжээгүй. Энэ гэрээ гэгчээр Хөрөнгө оруулалтын гэрээний 7.3 заалтыг түдгэлзүүлсэн.

Хууль зөрчсөн байсан учраас Ч.Сайханбилэгийн Засгийн газрын "Өмнөд бүсийн эрчим хүчний салбарт хамтран ажиллах гэрээ"-г бид сая түдгэлзүүллээ.Ингэснээр Оюутолгойн гэрээ хэрэгжих нөхцөл бүрдэж байна.  

Өөрөөр хэлбэл, Монголоос эрчим хүчээ 4 жилийн дотор авах ёстой байсан заалтыг түдгэлзүүлсэн гэрээг хүчингүй болгосон. Рио Тинто, Туркойз Хилл Ресурсын хэвлэлийн мэдээн дээр Тавантолгойн цахилгаан станцыг барихгүй гэсэн үг, өгүүлбэр байхгүй.

Гэрээ цуцлагдсанаар Оюу толгой 4 жилийн дотор эрчим хүчээ авах шаардлагатай болж байна. Энэ үүргээ биелүүлнэ гэж мэдэгдсэн байна лээ. Оюу толгойн цахилгаан станц барих гэрээг цуцаллаа гэдэг нь шал худлаа мэдээлэл. Засгийн газар Монгол Улсаас эрчим хүчээ ав гэдэг зүйлийг л ярьж байгаа.

Бид өөрсдийнхөө талаас хүлээсэн бүх үүргээ биелүүлсэн" гэж мэдэгдлээ. Ингээд Тавантолгойн цахилгаан станцын төслийн захирал Д.Батбилэг бас товч мэдээллийг өглөө.

Тэрбээр "Манай төсөл 2013 онд байгуулагдсан. Энэ хугацаанд ТТЦС-ын төслийн ТЭЗҮ болон бусад бүх судалгаа шинжилгээний ажлуудыг хийгээд өнөөдрийн байдлаар цахилгаан станцын бүтээн байгуулалтыг эхлүүлэхэд бэлэн болчихсон.

Хэрэв Рио Тинто баталгаа өгвөл 2018 онд ажлаа эхлүүлэх боломжтой болох юм" гэлээ.

Г.Ган

Санал болгох

Сэтгэгдэл

АНХААРУУЛГА: Уншигчдын бичсэн сэтгэгдэлд www.ENE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 9318-5050 утсаар хүлээн авна.