"Оюу толгой" ХХК-ийн туслан гүйцэтгэгч "Эпирок Монголиа" ХХК-ийн 161 ажилтан ажил хаялт зарлана
"Оюу толгой" ХХК-ийн туслан гүйцэтгэгч "Эпирок Монголиа" ХХК-ийн Үйлдвэрчний эвлэлийн хорооноос хуулийн хүрээнд ажил хаялт зарлахаар болсон талаараа мэдээлэл хийлээ.
"Эпирок Монголиа" ХХК-ийн ажилчдын зүгээс Оюутолгойн уурхайд, газар доор хүнд нөхцөлд 12 цагаар ажиллаж байгаа уурхайчдын илүү цагийн цалин хөлстэй холбоотой асуудлыг хөндөж ажил хаялт зарлаж байгаа аж. Үйлдвэрчний эвлэлийн хорооноос ажил олгогч нарт хуулийн дагуу тавдугаар сарын 01-нд /2023.05.01/ албан мэдэгдэл хүргүүлсэн байна. Компани, ажил олгогч хоёрын хооронд үүссэн хөдөлмөрийн эрхийн маргааны улмаас ажил үүргээ үргэлжлүүлэн биелүүлэх боломжгүйд хүрсэн. Ханган нийлүүлэгч компани илүү цаг бодуулах, дундаж цалин хөлсийг тооцуулах гэсэн хоёр зүйл заалтаар үүссэн маргаан 2022 оны долоодугаар сараас /2022.07/ эхэлжээ. "Түүнээс хойш өнөөдрийг хүртэл арван сарын хугацаанд хамтын гэрээ байгуулж чадаагүй” гэлээ.
"Оюу толгой" ХХК-ийн уурхайн талбарт ил болон далд уурхайн техник, бэхэлгээний тоног төхөөрөмж нийлүүлдэг "Эпирок Монголиа" ХХК нийт 161 ажилтантай бөгөөд тэд тавдугаар сарын 09-ний өдрөөс ажил хаялт зарлах юм.
Хөдөлмөрийн хуулийн дагуу ажлын найман цагаас илүү ажилласан бол илүү цаг тооцох ёстой байтал тус компанийн уртын ээлжийн ажилчид өдрийн 10 цаг нь энгийнээр, 2 нь илүү цаг болж байгаа гэлээ. Тиймээс уртын ээлжийн ажилчдын илүү цагийг хуулийн дагуу олгохыг шаардаж буйгаа илэрхийлсэн юм.
