ӨМӨЗО-оос БНХАУ-ын эргийн бүсийг чиглэсэн цэвэр эрчим хүчний нийлүүлэлт нь өртгийн хувьд одоогийн цахилгаан эрчим хүчний тариф, нүүрсний цахилгаан станцуудын нийлүүлэх өртгөөс хямд байна.

БНХАУ-ын нүүрс олборлолтын зангилаа цэг Өвөр Монголын Өөртөө Засах Орон говь, цөлийн бүсэд бүтээн байгуулах цэвэр эрчим хүчний мега төслүүдээрээ тус улсын эрчим хүчний шилжилтэд тэргүүлэх үүрэгтэй оролцохоор байгааг даваа гарагт гаргасан тайланд онцолжээ.

ӨМӨЗО дахь нар, салхины станцуудын одоогийн суурилагдсан хүчин чадал 88 гигаватт бөгөөд төлөвлөгдсөн шинэ төслүүдийг ашиглалтад оруулснаар хүчин чадал нь 170 гигаваттаар нэмэгдэх аж. Нэгтгэн тооцвол энэ нь Герман улсын нийт эрчим хүч үйлдвэрлэлийг ч хол давах үзүүлэлт юм.

Бодлогын оновчлолыг зөв хийж, дэд бүтцийг бэлдсэнээр тус бүс нутаг БНХАУ-ын эрэг дагуух томоохон хотуудыг хямд бөгөөд нүүрстөрөгчийн ялгаралгүй цахилгаан эрчим хүчээр тэтгэх боломжтойг “WaterRock Energy Economics” болон Эрчим хүч, цэвэр агаарын судалгааны төвийн судлаачид тайландаа дурджээ.

Холын зайн дамжуулах шугамын бүтээн байгуулалт нь ӨМӨЗО-ы нүүрсний болон сэргээгдэх эрчим хүчний станцуудыг Бээжин, Шаньдун муж болон эргийн бүсийн хүн ам нягт суурьшсан бусад хотуудтай холбох бололцоог бүрдүүлжээ. Хэдий тийм боловч тус шугам сүлжээ нь бүрэн ашиглагддаггүй, голчлон нүүрсний станцуудад үйлдвэрлэсэн цахилгаан эрчим хүчийг дамжуулж байгаа тул нар болон салхины эрчим хүчээр үйл ажиллагааг нь тэлэх боломж, орон зай сайтай гэж үзсэн байна.

ӨМӨЗО-оос БНХАУ-ын эргийн бүсийг чиглэсэн цэвэр эрчим хүчний нийлүүлэлт нь өртгийн хувьд одоогийн цахилгаан эрчим хүчний тариф, нүүрсний цахилгаан станцуудын нийлүүлэх өртгөөс хамаагүй хямд байгаа аж. Гэхдээ БНХАУ-ын Засгийн газар ӨМӨЗО дахь мега төслүүдийн төлөвлөгөөндөө нүүрсний станцуудыг багтаасан байгааг эргэн харах хэрэгтэй гэж судлаачид үзжээ.

Нар, салхины станцуудын эрчим хүчний нийлүүлэлтийн тогтвортой бус байдлыг нөхөхөд нүүрсний цахилгаан станцуудыг ашиглахаар загварчилсан боловч хямд өртөгтэй цэнэг хуримтлуур, эрчим хүч дамжуулах сайжруулсан технологиор дээрх асуудлыг шийдэх боломжтойг тодотгосон байна.

Б.Бат-Очир